Colexio Profesional de Enxeñaría Técnica en Informática de Galicia
O Colexio Profesional de Enxeñaría Técnica Informática de Galicia (CPETIG) é unha corporación de dereito público que aglutina os enxeñeiros de grao medio (titulados universitarios de ciclo curto) en Informática, os representa e traballa para organizar, protexer, mellorar e velar por un adecuado exercicio da profesión.
| Colexio Profesional de Enxeñaría Técnica en Informática de Galicia | |
|---|---|
 | |
| Tipo | colexio profesional |
| Campo de traballo | enxeñaría informática |
| Data de fundación | 2007 |
| Sede | Santiago de Compostela |
| Enderezo | Rúa Fernando III O Santo 13, 1.ºA 15701 |
| País | Galicia |
| Na rede | |
| https://cpeig.gal/ | |
    | |
| [ editar datos en Wikidata ] | |
Antecedentes e historia editar
A informática foise constituíndo, ao longo das últimas décadas, como unha rama de importancia crecente e independente. Nace como disciplina académica, en 1969, coa creación do Instituto de Informática, dependente do Ministerio de Educación e Ciencia, ao se considerar que para o correcto exercicio profesional era preciso a obtención previa de formación técnica e profesional.
A través do Decreto 327/1976, do 26 de febreiro, establécese a necesidade de que as ensinanzas en informática se desenvolvan a través da educación universitaria e da formación profesional. Os reais decretos 1460/1990 e 1461/1990, do 26 de outubro, estableceron, respectivamente, os títulos universitarios oficiais de enxeñaría técnica en informática de xestión e de enxeñaría técnica en informática de sistemas, e aprobaron as directrices xerais propias dos plans de estudos conducentes á súa obtención. Posteriormente, a titulación da diplomatura en informática foi homologada á da enxeñaría técnica en informática polo Real decreto 1954/1994, do 30 de setembro.
A Asociación de Doutores, Licenciados e Enxeñeiros en Informática de Galicia (AEIG) e máis a Delegación en Galicia da Asociación de Doutores, Licenciados e Enxeñeiros en Informática (ALI Galicia) presentaron unha solicitude conxunta para a creación do Colexio Profesional de Enxeñaría Técnica en Informática de Galicia. O 1 de decembro aprobouse a Lei 8/2006 do Parlamento de Galicia, de Creación do Colexio Profesional de Enxeñaría Técnica en Informática de Galicia. Nesta Lei, na súa exposición de motivos, recóllese:
A importancia da informática en canto aplicación para o mellor desenvolvemento da calidade de vida, a súa influencia e importancia nas transaccións económicas, na sinatura electrónica ou na protección de datos contidos en ficheiros informáticos e noutras moitas aplicacións, en campos tan relevantes coma o da medicina, fan que quede xustificado o interese público que se esixía para a constitución do colexio profesional.
Suliña así mesmo a Lei que
Coa creación do Colexio Profesional de Enxeñaría Técnica en Informática de Galicia garantirase que o exercicio desta profesión se axuste ás normas e ás regras que aseguren tanto a eficacia coma a eventual responsabilidade en tal exercicio, e polo tanto queda así garantida a finalidade última que é a protección dos dereitos dos cidadáns e das cidadás.
Na Lei 8/2006 dáselles o mandato á AEIG e ALI Galicia para que designasen unha Comisión Xestora que debía presentar uns estatutos provisionais que regulasen a convocatoria e o funcionamento da asemblea constituínte, que debería aprobar os estatutos definitivos do Colexio e designar os seus órganos de goberno antes do 2 de xaneiro do 2008. A asemblea constituínte celebrouse o 14 de decembro do 2007, e nela aprobáronse os actuais estatutos e elixiuse a actual xunta de goberno.
Presidentes editar
- 2007-: Leticia Diz Bengochea