Zaharrean Rugby Taldea
O Zaharrean Rugby Taldea foi un equipo de rugby da cidade de Donostia, en España, fundado en 1963 e desaparecido en 1993, que ó longo da súa existencia tivo varios nomes (Motobic Parte Vieja, Sociedad Deportiva Anoeta, Zaharrean Rugby Taldea e Club Deportivo Fortuna) conforme o equipo se integraba nas estruturas polideportivas duns clubs ou outros. Durante catro tempadas (1978/79, 1979/80, 1980/81 e 1981/82) o Zaharrean participou na máxima competición de liga do rugby español, a División de Honra.
Traxectoria editar
Os primeiros equipos de rugby de Donostia naceron a comezos da década de 1960. O primeiro deles foi o Rugby Club Guipúzcoa, fundado en 1962, e que en 1964 pasou a formar parte do Club Atlético San Sebastián. Este equipo acabaría sendo campión nacional varias veces. O segundo equipo da cidade naceu en 1963 co nome Motobic Parte Vieja, sendo Motobic un concesionario de motos que patrocinou as actividades do equipo nos seus primeiros pasos.[1] A carencia dun terreo de xogo levou ó equipo a integrarse dentro da Sociedad Deportiva Anoeta, unha entidade polideportiva con seccións de atletismo, natación, baloncesto, balonmán, hóckey etc, que levaba a cabo as súas actividades nas instalacións da antiga cidade deportiva de Anoeta.[2]
A Sociedad Deportiva Anoeta desapareceu a finais dos anos 1970, rebautizándose o equipo de rugby en 1978 como Zaharrean Rugby Taldea. "Zaharrean" significa "Parte Vieja" en lingua vasca, e ademais era o nome dunha asociación de comerciantes da zona antiga da cidade que comezou a patrocinar ó equipo. O cambio de nome coincidiu co ascenso do equipo á máxima categoría do rugby nacional, a División de Honra. O Zaharrean competiu catro tempadas (1978/79, 1979/80, 1980/81 e 1981/82) dentro do Grupo Norte da División de Honra, que nesa época estaba formada por 32 equipos divididos en catro grupos xeográficos. Trala tempada 1981/82 o equipo descendeu de categoría e integrouse dentro doutra sociedade polideportiva da cidade, o Club Deportivo Fortuna[3] que lle daría nome até o fin da sección de rugby en 1993, ano de desaparición das vellas instalacións de Anoeta, que foron substituídas polo moderno Estadio Municipal de Anoeta.
Palmarés editar
- Campión da Copa FER: 1
- 1970/71
- Tempadas na primeira división de rugby: 4
- 1978/79, 1979/80, 1980/81, 1981/82
- Tempadas na segunda división de rugby: 4
- 1977/78, 1982/83, 1983/84, 1984/85
Notas editar
- ↑ Equipos del pasado Arquivado 26 de decembro de 2016 en Wayback Machine., artigo de Noticias de Gipúzkoa. (en castelán)
- ↑ Campos de Deportes Anoeta, artigo de Euskomedia. (en castelán)
- ↑ Historia do CD Fortuna Arquivado 27 de decembro de 2016 en Wayback Machine. (en castelán)