Xosefa de Bastavales
Josefa Juncal Barreiro, máis coñecida como Josefa ou Xosefa de Bastavales, nada en Santaia (Gorgullos, Tordoia) o 20 de xullo de 1932 e finada o 2 de outubro de 2024 en Bastavales (Brión), foi unha pandeireteira galega.
| Biografía | |
|---|---|
| Nacemento | (es) Josefa Juncal Barreiro  20 de xullo de 1932 Gorgullos, España |
| Morte | 2 de outubro de 2024 (92 anos) Bastavales, España |
| Actividade | |
| Ocupación | percusionista |
| Movemento | Bravú |
| Instrumento | Pandeireta |
Traxectoria
editarNacida no lugar de Santaia, no concello de Tordoia, cando fixo os dezaseis anos, os seus pais foron vivir á parroquia de Bastavales, en Brión. A pesar de deixar de vivir en Tordoia, Josefa seguiu mantendo contacto co seu concello natal, e ía con frecuencia ás súas romarías. Por medio dun veciño que tocaba o acordeón nas celebracións relixiosas na igrexa de Bastavales, comezou o seu interese na música e aprendeu a tocar ese instrumento e tamén a pandeireta, de xeito autodidacta, ademais de cantar música tradicional.
A súa vida pegou un xiro xa cunha idade avanzada, cando o xornalista e escritor vilalbés Ramón Chao mercou unha casa en Bastavales, e ambos trabaron amizade.[1] Así coñeceu tamén ao fillo deste, o célebre músico galego-francés Manu Chao, co que comezou a tocar a pandeireta e a cantar, do mesmo xeito que con Xurxo Souto, converténdose nunha figura do movemento bravú.[2] Con preto de 70 anos foi con Manu Chao de xira, actuando en lugares como Barcelona, Lión ou o Festival Intercéltico de Lorient.[2][3]
Durante eses anos colaborou en diversos programas de televisión, visitou distintos lugares da xeografía galega e compartiu escenario con distintos grupos e artistas de recoñecido prestixio tanto a nivel nacional como internacional como Os Diplomáticos de Monte-Alto, Cristina Pato, Susana Seivane, Fuxan os Ventos, Mercedes Peón, Compay Segundo ou o grupo de música folk irlandés The Chieftains.[2]
Faleceu en Bastavales o 2 de outubro de 2024, aos 92 anos de idade.[2]
Notas
editar- ↑ AfundaciónTV (12 de decembro de 2021). "Marchei de xira con Manu Chao con 70 anos" Josefa de Bastavales - Arrieiros somos (YouTube).
- ↑ 2,0 2,1 2,2 2,3 "Falece a pandeireteira histórica Josefa de Bastavales: "Unha persoa e artista marabillosa"". Nós Diario. 2 de outubro de 2024. Consultado o 3 de outubro de 2024.
- ↑ "Josefa, a pandereteira de Manu Chao"; "A veciña de Bastavales, con 72 anos de idade, estivo de xira por terras de España e Francia canda o intérprete de orixe galega durante 9 meses" Arquivado 13 de marzo de 2009 en Wayback Machine. Artigo en TierrasDeSantiago.com (23 de xaneiro de 2007) (en castelán)