Wikipedia:Artigo destacado/xuño 2014

Nova Zelandia (en inglés: New Zealand; en maorí: Aotearoa) é un país insular de Oceanía que se localiza no suroeste do océano Pacífico, formado por dúas grandes illas: a Illa Norte e a Illa Sur, xunto a outras moitas illas menores, destacándose entre elas a Illa Stewart e as Illas Chatham. O Reino de Nova Zelandia tamén inclúe ás Illas Cook e Niue (estados autónomos en libre asociación) e a Toquelau.

Nova Zelandia, notable polo seu illamento xeográfico, está situada preto de 2000 quilómetros ao sueste de Australia no mar de Tasmania, e os seus veciños máis próximos ao norte son Nova Caledonia, Fidxi e Tonga. Debido a este longo illamento, no país desenvolveuse unha fauna endémica dominada polas aves, moitas das cales se extinguiron logo da chegada dos humanos e os mamíferos que introduciron sen ningún control. A maior parte da poboación neozelandesa é de ascendencia europea; os indíxenas maorís son a minoría máis numerosa. Os asiáticos e os polinesios tamén son minorías significativas, especialmente nas zonas urbanas. Aínda que ten tres idiomas oficiais, o máis falado con diferenza é o inglés.