Urica é a capital da parroquia do mesmo nome situada a 45 km ao sueste do poboado de Santa Inés, no estado Anzoátegui en Venezuela.

Localízase nas coordenadas xeográficas: 09° 43’ 00” de latitude Norte e 64° 00’ 30” de Lonxitude Oeste. Foi fundada polos españois a mediados do século XVIII sobre unha planicie bañada polas augas do Río Urica e o Río Amana, rodeada dos sitios de cría pecuaria de maior fama en Anzoátegui e coñecida como gran produtora de froitos menores.

Nesta poboación tiveron lugar memorables accións de guerra tales como as de José Félix Ribas e José Francisco Bermúdez contra José Tomás Boves. O 12 de setembro de 1814 deuse a Batalla de Curareque; o 5 de decembro dese mesmo ano a soada Batalla de Urica na que morreu Boves e por iso ten a súa tumba na vila. O 27 de abril de 1870 deuse a Batalla de Altagracia, e o 20 de febreiro de 1902, a batalla da Ponte.

En 1879, por disposición do Congreso Nacional da República, é creado o Gran Estado de Oriente, cuxa capital sería Urica. Esta división político territorial que, no seu momento estivo conformado polos actuais estados Anzoátegui, Sucre e Monagas, mantívose vixente até 1881 cando recibiu o nome de Estado Bermúdez, para, en 1898, finalmente adoptar a denominación de Estado Sucre.