Tito Valdés
Jesús Valdés Álvarez, máis coñecido como Tito Valdés, nado en Santiago de Compostela o 10 de outubro de 1949, é un exfutbolista galego, que xogaba como centrocampista. Integrante histórico do Burgos CF, é o xogador que máis veces vestiu a súa camiseta e foi o seu último capitán antes da desaparición do club.
| Tito Valdés | |||
|---|---|---|---|
| Información persoal | |||
| Nome | Jesús Valdés Álvarez | ||
| Nacemento | 10 de outubro de 1949 | ||
| Lugar de nacemento | Santiago de Compostela | ||
| Altura | 1,80 m. | ||
| Posición | Centrocampista | ||
| Carreira xuvenil | |||
| Compostela | |||
| Carreira sénior | |||
| Anos | Equipos | Aprs | (Gls) |
| 1968–1972 | Compostela | ||
| 1968–1969 | → Bergantiños | ||
| 1972–1974 | Ourense | 37+ | (2+) |
| 1974–1983 | Burgos CF | 273 | (50) |
| 1983–1984 | Real Burgos | (9) | |
|
Partidos e goles só en liga doméstica. [ editar datos en Wikidata ] | |||
Comezou a súa carreira no Compostela, pasando logo ao Ourense, co que logrou o ascenso a Segunda División na tempada 1972/73. En 1974 fichou polo Burgos, no que militou durante 9 tempadas ata a desaparición do club en 1983, disputando 321 encontros oficiais e marcando 62 goles, 21 deles na Primeira División, na que militou catro anos. Retirouse xogando co sucesor do Burgos CF, o Real Burgos, na Terceira División.
Traxectoria editar
Formouse na canteira da SD Compostela, subindo ao primeiro equipo en 1968.[1] Disputou ese ano a Copa Galicia,[2] competición na que o equipo foi eliminado polo Rápido de Bouzas.[3] Para a tempada 1968/69 foi cedido ao Bergantiños, co que competiu na Serie A galega e gañou a Copa Galicia, derrotando na final ao Turista.[4]
De regreso ao Compostela xogou na Terceira División, descendendo ao remate da tempada 1969/70 e recuperando a categoría na seguinte, ao proclamarse campión da Serie A. En 1972 fichou polo Ourense, tamén de Terceira, co que logrou o ascenso á Segunda División na súa primeira tempada. Disputou case todos os encontros da tempada 1973/74 na categoría de prata, tendo como compañeiro habitual no centro do campo a Antonio Ordax, e marcou dous goles.
En xullo de 1974, trala marcha ao Burgos do adestrador do Ourense, o coruñés Naya, o xogador foi traspasado ao club burgalés.[5] Debutou co seu novo club na primeira xornada da tempada 1974/75 da Segunda División contra o Valladolid e foi titular durante case todos os partidos da campaña, marcando un total de 8 goles. Na seguinte tempada o Burgos proclamouse campión, ascendendo así á Primeira División por segunda vez na súa historia. Valdés contribuíu con 9 goles, incluído un triplete contra o Castellón, e anotou 3 máis na Copa do Xeneralísimo.
Na tempada 1976/77 debutou na máxima categoría do fútbol español, e fíxoo marcando un gol na primeira xornada contra o Espanyol no Plantío. Con Marcel Domingo como adestrador, o Burgos logrou a permanencia por primeira vez na súa historia. Valdés disputou 30 dos 34 encontros de liga, e marcou 8 goles, aos que sumou outros 3 na Copa do Rei. O equipo mantívose durante catro tempadas na máxima categoría, disputando Valdés 114 encontros e converténdose no máximo goleador do club en Primeira, con 21 goles. Tralo descenso na tempada 1979/80, continuou tres tempadas máis no club, actuando como capitán e acadando os 321 partidos oficiais, cifra récord na historia do club. O Burgos CF desapareceu en 1983, e Valdés renunciou a mellores ofertas para xogar no novo Real Burgos, co que marcou outros 9 goles na Terceira División antes de retirarse en 1984.[6]
Vida persoal editar
É pai do xogador de squash e preparador físico Roberto Valdés,[7] que traballou durante anos co adestrador Luisito en equipos como o Racing de Ferrol, o Ourense ou o Pontevedra.[8] É ademais sogro do exfutbolista e adestrador Gelucho.[9]
Palmarés editar
- Bergantiños
- Copa Galicia (1): 1969.
- Compostela
- Serie A (1): 1970/71.
- Ourense
- Terceira División (1): 1972/73.
- Burgos
- Segunda División (1): 1975/76.
Notas editar
- ↑ "Declaraciones de Yayo, entrenador de la S. D. Compostela". El Pueblo Gallego (en castelán). 27 de agosto de 1968. p. 15. Consultado o 4 de febreiro de 2022.
- ↑ "Compostela, 0 Rápido de Bouzas, 1". La Voz de Galicia (en castelán). 2 de xuño de 1968. p. 13.
- ↑ "Pese a haber empatado con el Compostela (0-0) el Rápido pasa a semifinales". El Pueblo Gallego (en castelán). 11 de xuño de 1968. p. 15. Consultado o 4 de febreiro de 2022.
- ↑ "El Bergantiños campeón". El Pueblo Gallego (en castelán). 1 de xullo de 1969. p. 15. Consultado o 4 de febreiro de 2022.
- ↑ "Valdés, traspasado al Burgos". El Pueblo Gallego (en castelán) (18468). 19 de xullo de 1974. p. 12. Consultado o 6 de febreiro de 2022.
- ↑ "El Trofeo Tito Valdés premiará al Máximo Goleador del Burgos CF" (en castelán). 27 de agosto de 2019. Consultado o 6 de febreiro de 2022.
- ↑ Alonso, Paulo (3 de decembro de 2009). "Hijo de futbolista y campeón de squash". La Voz de Galicia (en castelán). Consultado o 6 de febreiro de 2022.
- ↑ Otero, Manu (16 de decembro de 2016). "Una familia unida por los banquillos". La Voz de Galicia (en castelán). Consultado o 6 de febreiro de 2022.
- ↑ "Lugo-Burgos, un partido especial e con historia familiar". Telexornal. 29 de xaneiro de 2022. Consultado o 6 de febreiro de 2022.
Véxase tamén editar
Ligazóns externas editar
- Datos do xogador en BDFutbol (en castelán).