Tierra Comunera

Tierra Comunera (TC) foi un partido político español de tendencia castelanista.

Tierra Comunera
Acrónimo	TC e TC-PNC
Tipo	partido político
Ideoloxía	Nacionalismo castelán, federalismo e Progresismo
Data de fundación	7 de novembro de 1988
Data de disolución	19 de xaneiro de 2009
Sede	Burgos
País	España
Na rede
http://www.tierracomunera.org/
[ editar datos en Wikidata ]

Fundación

Foi fundado en decembro de 1988 en Soria, se ben tiña maior implantación política na cidade de Burgos, onde estaba localizada a súa sede central. O nome orixinal do partido no momento da fundación era Tierra Comunera, mais en 1991 pasou a denominarse Tierra Comunera-Partido Nacionalista Castellano (TC-PNC). Logo do seu VII Congreso Nacional, celebrado en Segovia no 2004, acordouse mudar de novo o nome do partido, eliminando o apéndice Partido Nacionalista Castellano e volvendo ao orixinario: Tierra Comunera.

Programa político

TC esixía o recoñecemento de Castela como nacionalidade histórica e a súa unidade territorial, superando a fragmentación da "nación" castelá en cinco comunidades autónomas (Castela e León, Castela-A Mancha, Madrid, Cantabria e A Rioxa), aínda cando a súa representación nestas dúas últimas comunidades autónomas é inexistente. Politicamente, TC definíase como nacionalista, progresista e ecoloxista.

Resultados electorais

Acto de Tierra Comunera en Toledo.

En 1999 obtivo os mellores resultados electorais da súa historia, atinxindo representación no concello de Burgos e mais nas Cortes de Castela e León. Mais nas seguintes eleccións municipais e autonómicas (2003) perdeu a representación nas Cortes, aínda que acrecentou a súa presenza en municipios de provincias castelás como Ávila, Segovia, Valladolid, Palencia, Guadalaxara e mais Cidade Real, sen contar a provincia de Burgos, na cal o partido ten decenas de cargos públicos.

Porén, nunca obtivo representación de nivel estatal.