Theodoric Rood

Theodoric Rood (tamén Theoderic ou Theodericus) foi un impresor de incunables de Oxford, Inglaterra. A súa actividade na cidade poden ser datadas con algunha certeza entre os anos 1481 e 1482, mais é probable que se estendesen ata 1484. Algúns dos primeiros libros impresos, entre 1478 e 1479, así como unha edición do Liber Festivalis, de John Mirk, de 1486 ou 1487, que outrora foron atribuídos á imprenta de Rood, considéranse hoxe obras doutros impresores non identificados.

TraxectoriaEditar

Rood foi a Oxford desde Colonia, en Alemaña, e con el levou tipos e, probablemente, tamén unha prensa. Logo de se establecer Oxford, trabou ligazóns coa universidade da cidade a través da incipiente Oxford University Press, onde imprimiu algúns traballos académicos en latín, entre os que é de salientar Compendiun totius grammaticae, de John Anwykyll, arredor de 1483 (do que se coñece só unha copia fragmentaria na Bodleian Library).[1]

Hoxe estímase en trece o número de edicións conservadas saídas do prelo de Rood.[2] Entre estes libros, só dous están datados: o máis temperán, de 1481, é Expositio super libros Aristotelis de anima, de Alexandre de Hales; e o máis tardío é Liber moralium super threnis Ieremiae, de John Lathbury, datado o 31 de xullo de 1482. As restantes edicións que hoxe se conservan carecen de data.

NotasEditar

  1. British Library. Catalogue of Books Printed in the XVth Century now in the British Library. BMC. Part XI. England. 't Goy-Houten: Hes & De Graf, 2007. Páxinas 234 a 243. (En inglés)
  2. E. Gordon Duff, Printing in England in the Fifteenth Century: E. Gordon Duff's bibliography [of 1917] with supplementary descriptions, chronologies and a census of copies by Lotte Hellinga. (En inglés)