Sección Femenina

A Sección Femenina fai referencia á institución creada en 1934, durante a Segunda república española, e que acadaría unha gran relevancia coa transformación do Estado Español nun réxime ditatorial de corte fascista. En xullo de 1936, tiña unhas 2.500 afiliadas e cara ao final do franquismo, en 1973, contaba con 279 697 militantes.

Pilar Primo de Rivera (segunda pola dereita), participando nunha reunión na Alemaña nazi (1941).

Orixe

Era a rama feminina de Falange Española, que foi dirixida dende a súa constitución por Pilar Primo de Rivera, filla do ditador Miguel Primo de Rivera e irmá de José Antonio Primo de Rivera, fundador da Falange. Compartía tanto os ideais coma a estética con este partido de corte fascista. As figuras de Isabel a Católica e Tareixa de Ávila foron os símbolos escollidos en representación da institución.

A principal dirixente de Galicia foi María Victoria Eiroa.

Características

Tiña como finalidade a beneficencia social, destinada principalmente, aínda que non unicamente, á muller. Estaba organizada en diferentes rexidurias repartidas polo país. Dentro do seu labor social destaca: a atención médica, coidado de anciáns, garderías, centros para discapacitados tanto físicos como mentais... a reconstrución do patrimonio histórico como o Castelo de La Mota; formación de caravanas para asistir ás zonas rurais...

A súa patroa era Tareixa de Ávila motivo polo cal a revista da sección feminina chamouse Teresa.

Ao igual que o Auxilio Social e a Igrexa Católica, a Sección Femenina tamén xogou un papel fundamental na reeducación e formación cristiá de nenos e mulleres, poñendo de relevo os valores patrióticos e cristiáns, e avogando polo sometemento da muller á figura do home, como quedou indicado por Pilar Primo de Rivera no V Consello Nacional celebrado en Barcelona en 1941:

As Seccións Femininas respecto aos seus xefes, teñen que ter unha actitude de obediencia e subordinación absoluta. Como é sempre o papel da muller na vida, de submisión ao home.

Véxase tamén

Bibliografía

• Morant i Ariñó, Toni (2015). Národní pedagogické muzeum a knihovna J. A. Komenského, ed. "Die Frauenabteilung der spanischen Falange und die europäischen Faschismen, 1933-1945" (PDF). Historia Scholastica (en alemán) (Praga) (1): 42–56. ISSN 2336-680X. 
• Payne, Stanley G. (1999). Fascism in Spain, 1923–1977 (en inglés). Madison: University of Wisconsin Press. ISBN 0-299-16560-4. 
• Preston, Paul (2003). "Pilar Primo de Rivera. El fascismo y los arreglos florales". Las tres Españas del 36 (en castelán). Barcelona: Debolsillo. ISBN 9788497930611. 

Outros artigos

• Falange Española