Salmón da sabedoría

O salmón da Sabedoría ou salmón do Coñecemento (bradán feasa en Gaélico irlandés) é unha criatura que atopamos no Ciclo de Fenian, pertencente á mitoloxía irlandesa; aparece n'As Fazañas Infantís de Fionn, que reúne as primeiras aventuras de Fionn Mac Cumhaill.

Características

editar

De acordo coa narración, tratábase dun salmón ordinario que comeu as nove abelás que caeron na Fonte da Sabedoría desde nove abeleiras que a rodeaban. Da Fonte da Sabedoría manaban augas que orixinaban cinco ríos, entre eles os ríos Boyne e Shannon. Ao comer as abelás, o salmón obtivo todo o coñecemento do mundo. Ademais, a primeira persoa que comese da súa carne gañaría, á súa vez, o coñecemento total.

O poeta Finn Eces ou Finnegas pasou sete anos tentando pescar o salmón. Cando finalmente o capturou, ordenou ao seu aprendiz, Fionn, que llo preparase. Mentres o facía, Fionn queimouse o polgar coa graxa quente que saltaba do salmón, e para atenuar a dor introduciu o dedo na boca. Cando lle levou a comida a Finnegas, este descubriu na mirada do mozo un brillo que que non vira antes. Cando Finegas lle preguntou polo sucedido, Fionn negou que comese o peixe, pero, baixo presión, admitiu ter probado a súa graxa por accidente. Foi esta incrible sabedoría e coñecemento obtido do salmón da sabedoría o que permitiu a Fionn converterse no xefe dos Fianna, os famosos heroes da mitoloxía irlandesa.