Rihards Zariņš
Rihards Zariņš (coas variantes Richards Zarriņš e Richard Sarrinsch), nado o 27 de xuño de 1869 no municipio de Kocēni e finado o 21 de abril de 1939 en Riga, foi un artista gráfico letón coñecido por ser autor do escudo de Letonia e polos seus deseños de moedas, billetes e selos.[1][2]
Rihards Zariņš | |
---|---|
Nacemento | 27 de xuño de 1969 |
Kocēni. Letonia | |
Falecemento | 21 de abril de 1939 |
Riga Letonia | |
Área | Deseño gráfico: moedas, billetes, selos, carteis... |
Educación | Academia de Arte e Industria Stieglitz de San Petersburgo. |
Movemento | Nacionalismo romántico. |
Obras | Escudo de Letonia (1921), moeda de 5 lats (1929). |
Nacionalidade | Letonia |
[ editar datos en Wikidata ] |
Traxectoria editar
Rihards Zariņš naceu en Kocēni, na daquela Gubernia de Livonia, pertencente ao Imperio Ruso, e máis tarde trasladouse coa súa familia a Līgatne e a Daugavpils. Realizou os seus estudos artísticos superiores en San Petersburgo, onde en 1895 se graduou na Academia de Arte e Industria Stieglitz, nas especialidades de litografía e gravado, co profesor Vasily Matthew. Logo continuou a súa formación artística durante catro anos en Berlín, en Múnic e en Viena, onde afondou na litografía, e en París, onde perfeccionou as súas habelencias na acuarela e no pastel.[2]
Logo do seu regreso a Rusia foi contratado na Imprenta Imperial Rusa en San Petersburgo, na que permaneceu durante vinte anos e da que chegou a ser o seu director técnico. A partir de 1905 encomendóuselle o deseño de toda a documentación estatal.[2]
Pouco despois de que Letonia declarase a súa independencia do Imperio ruso, en 1919 Zariņš desprazouse a Riga para se encargar da imprenta gobernamental. Ocupou este cargo durante 14 anos, ata a súa xubilación en 1934.[2]
Como consecuencia dun derramo cerebral, perdeu a capacidade de falar, aínda que continuou coa súa actividade artística ata o final da súa vida, o 21 de abril de 1939, na capital do país.[2]
En 2019, con motivo do 150 aniversario do seu nacemento, o Goberno letón emitiu un selo postal conmemorativo cun retrato de Rihards Zariņš, co valor facial de 0,57 euros.[3]
Obra editar
Zariņš foi un dos artistas plásticos letóns máis recoñecidos. As súas primeiras obras datan dos primeiros anos da década de 1890 e apareceron publicadas nas páxinas da revista en lingua letoa Austrums ("O Leste"), cando aínda era un estudante da Academia Stieglitz, en San Petersburgo. Dedicou unha gran parte do seu tempo ao estudo da ornamentación popular e, baixo a súa coordinación, as editoras estatais elaboraron unha obra monumental sobre as artes decorativas en Letonia.[2][4]
Ao longo da súa carreira, o artista foi autor de numerosos selos postais do Imperio Ruso, da Unión Soviética, da República Popular de Belarús e de Letonia. Entre eles, cómpre salientar o primeiro selo soviético, emitido en 1918.[1]
Zariņš foi tamén un autor prolífico de ilustracións bibliográficas, ex libris, gravados diversos e litografías. A súa obra tamén abrangue os debuxos, acuarelas e caricaturas.[2]
Entre os seus traballos máis destacables de artes aplicadas figuran o escudo de armas de Letonia[5] e os deseños de diversos billetes e moedas do sistema do lats letón.[6]
Galería de obras editar
Notas editar
- ↑ 1,0 1,1 "Rihards Zariņš". The British Museum.
- ↑ 2,0 2,1 2,2 2,3 2,4 2,5 2,6 Kļaviņš, E. (2009). "Rihards Zariņš. Biogrāfija un mākslinieciskā darbība Arquivado 14 de agosto de 2022 en Wayback Machine.". Latvijas mākslas vēsture.
- ↑ "150th Anniversary of Graphic Artist - Rihards Zarins". Wopa-plus.com
- ↑ "Rihards Zariņš. Ornamentation and Graphics". Noar.eu
- ↑ Dukmane, K. "Valsts Simboli: Ģerbonis". Makslaplus.lv
- ↑ "Latvia • Old lats (1922-1940). Engraver: Rihards Zariņš". Numista.com.
Véxase tamén editar
Wikimedia Commons ten máis contidos multimedia na categoría: Rihards Zariņš |
Outros artigos editar
Ligazóns externas editar
- Rihards Zariņš (1869–1939). What Latvia’s Forests Are Whispering Arquivado 28 de outubro de 2020 en Wayback Machine. (Latvian National Museum of Art)