Pinga de aceite ocular

Unha pinga de aceite ocular é unha pinga de aceite ás veces coloreado que se encontra nos ollos dalgúns animais, localizado dentro das células fotorreceptoras. Son especialmente comúns nos ollos de aves (ver visión das aves) e réptiles diúrnos, aínda que están presentes noutros taxons, como os peixes pulmonados, pero non existen no ollo humano. Son moito máis frecuentes dentro dos conos da retina que dentro dos bastóns, o que suxire que exercen un papel na visión das cores. A súa presenza en bastóns pode implicar que estes foron modificados a partir duns conos ancestrais. Ocasionalmente aparecen en dobres conos ou dobres bastóns. Algunhas destas pingas de aceite están coloreadas, mentres que outras son incoloras. Dentro do cono están situadas no seu segmento interno, onde interceptan e filtran a luz antes de que esta pase ao segmento extrerno do cono, onde se encontra o pigmento visual.

Célula cono de ave que contén unha pinga de aceite.

A vantaxe adaptativa das pingas de aceite non está firmemente establecida. As pingas de aceite coloreadas teñen un custo porque reducen a cantidade de luz dispoñible para o sistema visual. Tamén reducen o solapamento na sensibilidade espectral entre diferentes tipos de conos (por exemplo, a sensibilidade ás lonxitudes de onda curtas ou ás medias ou longas). Isto pode ser beneficioso porque incrementa a cantidade de cores que poden ser discriminados, e os cálculos feitos por Vorobyev (2003) apoian a hipótese de que isto é un beneficio neto.