O peixe lúa (Mola mola), ou peixe roda é o peixe óseo máis pesado coñecido. Ten un peso medio de mil quilogramos. Habita en augas tropicais e temperadas arredor do mundo. Semella unha testa de peixe sen cola, e o seu corpo é aplanado polos laterais. Os peixes lúa poden ser tan altos coma longos cando estenden as súas aletas dorsais e ventrais.

Peixe lúa

Peixe lúa no Nordsøen Oceanarium.
Estado de conservación
Datos insuficientes
Clasificación científica
Reino: Animalia
Filo: Chordata
Clase: Actinopterygii
Orde: Tetraodontiformes
Familia: Molidae
Xénero: 'Mola'
Especie: M. mola
Nome binomial
'Mola mola'
(Linnaeus, 1758)
Probabilidade de presenza do M. mola
Probabilidade de presenza do M. mola

Probabilidade de presenza do M. mola

Teñen unha dieta que consiste principalmente en medusas. Como esta dieta é pobre en nutrientes, consómenas en grandes cantidades para desenvolverse e manter a súa medida. As femias poñen máis ovos que calquera outro vertebrado coñecido. As crías semellan peixes globos, con grandes aletas pectorais, unha aleta caudal e espiñas corporais que non son típicas dos exemplares adultos.

Os peixes lúa adultos son vulnerables a poucos predadores naturais, pero os leóns mariños, as candorcas e os tiburóns cómenos. Os peixes lúa acotío quedan accidentalmente atrapados en redes, e tamén son vulnerables a mancarse ou morrer por causa de refugallos flotantes, como bolsas de plástico.

É un membro da orde dos tetraodontiformes, que inclúe ós peixes globo, ós peixes ourizo e ós peixes bésta, cos cales comparte moitos trazos comúns.

Peixe lúa en Galicia editar

As capturas desta especie son sempre accidentais e adoitan ser noticias da prensa escrita. Aínda así, a sinonimia (e variantes) que recolleu Ríos Panisse nos diferentes portos da costa galega indican unha frecuencia habitual. Ademais dos nomes indicados, peixe lúa e peixe roda (ou, simplemenmte, roda), nomes derivados da súa forma plana e circular, tamén recolleu o de orellán (ou orelló e ourellán), procedentes da similitude das aletas dorsal e ventral con grandes orellas; peixe porco, pola abundancia de parasitos sobre a súa pel; petaca, pola súa forma. Cornide, Franco Grande e Eladio Rodríguez recolleron como vulgares os nomes de mola, moa e peixe moa.

Prohibición do seu consumo na Unión Europea editar

Entre os humanos, os peixes lúa son considerados unha exquisitez nalgunhas partes do mundo, coma no Xapón, Corea e Taiwán, pero na Unión Europea está prohibido vender a súa carne[1].

Notas editar

  1. Regulamento (CE) nº 853/2004, do Parlamento Europeo e do Consello, de 29 de abril de 2004, polo que se establecen normas específicas de hixiene dos alimentos de orixe animal (DO L 139, de 30.4.2004), Sección VIII: Produtos da pesca, Capítulo V: Normas sanitarias para os productos da pesca; punto E: "Non se porán no mercado produtos da pesca derivados de peixes velenosos das seguintes familias: Tetraodontidae, Molidae, Diodontidae e Canthigasteridae".

Véxase tamén editar

Bibliografía editar

  • RÍOS PANISSE, M. Carmen: Nomenclatura de la flora y fauna marítimas de Galicia (Invertebrados y peces). Anejo 7 (1977) de Verba, Universidad de Santiago de Compostela, 1977, px. 320-321.

Ligazóns externas editar