Pedro Piñeiro

Pedro Piñeiro Hermida, nado no Valadouro en 1946, é un mestre e político galego vinculado ao PSdeG-PSOE que foi alcalde de Rianxo entre 1994 e 2011

Pedro Piñeiro

(2009)
Biografía
Nacemento	1946 (77/78 anos) O Valadouro, España
Alcalde de Rianxo
1994 – 2011 ← Xosé Bravo Frieiro – Adolfo Muíños →
Deputado provincial
Datos persoais
País de nacionalidade	España
Actividade
Ocupación	político , mestre
Partido político	Partido Socialista Obrero Español
Membro de	Partido dos Socialistas de Galicia
Lingua	Lingua galega

Traxectoria

Pedro Piñeiro instalouse nos anos 70 na vila mariñeira de Rianxo coma mestre do CEIP Castelao, do cal chegou a ser director ata o seu acceso á alcaldía do concello. Nas eleccións municipais de 1991 foi elixido concelleiro polo PSdeG-PSOE ocupando a área de Cultura, ata a renuncia de Xosé Bravo Frieiro á alcaldía en abril de 1994, tralo cal foi elixido novo rexedor a partir do 9 de maio seguinte. Nas eleccións municipais de 1995 encabezou a candidatura do PSdeG-PSOE e logrou a alcaldía con maioría absoluta, ampliando os apoios que o partido lograra 4 anos antes. Nas municipais de 1999 revalidou novamente a alcaldía, con resultados similares ós anteriores comicios. Nas municipais de 2003 revalidou de novo a alcaldía ampliando notoriamente o seu respaldo, subindo de 9 a 11 concelleiros e logrando o maior número de votos logrado por ningún partido en Rianxo.

Nas municipais de 2007 encabezou de novo a candidatura do PSdeG-PSOE e revalidou novamente a alcaldía con maioría absoluta, se ben experimentou un considerable retroceso de apoio e baixou de 11 a 9 concelleiros. Neste último mandato foi elixido deputado provincial. Durante todo este tempo foi independente, sen chegar a afiliarse ao PSdeG. Renunciou a presentarse á reelección nas municipais de 2011, polo que o 11 de xuño foi sucedido por Adolfo Muíños (BNG). En 2012 foi condenado polo TSXG a seis meses de prisión e 14 anos de inhabilitación por delitos de prevaricación urbanística na concesión dunha licenza a un taller de pedra propiedade dun familiar dun dos membros da corporación de goberno, construído sobre chan non urbanizable, e por non tomar medidas para repoñer a legalidade.

Véxase tamén

Outros artigos

• Eleccións municipais en Rianxo