Pazo dos Deportes de Riazor

O Pazo dos Deportes de Riazor é un pavillón polideportivo situado na cidade da Coruña (Galiza), situado á beira do paseo marítimo da capital coruñesa, na Rúa de Manuel Murguía, xusto ao carón do Estadio Municipal de Riazor. O edificio, obra de Santiago Rey Pedreira, foi inaugurado o 1 de agosto de 1970 e ten capacidade para 5.000 espectadores. Está catalogado como elemento patrimonial.

Pazo dos Deportes de Riazor
Vista xeral
Tipo	instalación deportiva
Localización
43°22′N 8°25′O
Estado	España
Comunidade autónoma	Galicia
Provincia	provincia da Coruña
Concello	A Coruña
Localización	A Coruña, Galiza
Datas
Fundación	1 de agosto de 1970
Inauguración	1 de agosto de 1970
Acontecementos
	Copa do Rei 2020 de hóckey a patíns
	Q84614612
Dimensións
Capacidade	4.425 espectadores
Persoas e organizacións
Propietario	A Coruña
Arquitecto	Santiago Rey Pedreira
Ocupante	Hockey Club Liceo da Coruña e Hockey Club Coruña Feminino
Deporte
Localía	HC Liceo (hóckey a patíns) CB Coruña (baloncesto)
[ Wikidata ]

Para outras páxinas con títulos homónimos véxase: Pazo dos Deportes (homónimos).

Historia

Foi inaugurado o 1 de agosto de 1970, nun partido que enfrontou á Selección española de hóckey a patíns fronte a un combinado de xogadores do resto do mundo no que resultou vencedor o combinado español por 4-2. Contou coa presenza do Xefe do Estado Español, Francisco Franco, e a súa esposa; o ministro do Exército, tenente coronel Castañón de Mena; o delegado nacional de Educación Física e Deportes, Juan Antonio Samaranch; o alcalde da Coruña, José Pérez-Ardá; máis outras autoridades locais e galegas.

Desde a súa estrea o Pazo ten albergado en dúas ocasións o Mundial de hóckey a patíns: en 1972, cando gañou a selección de España, e en 1988, cando Italia gañou o seu terceiro título, revalidándoo. Tamén se disputaron nel outras grandes competicións deportivas.

O 25 e 26 de setembro de 1982 tivo lugar no Pazo dos Deportes de Riazor a fundación do BNG.

Ademais de ser a sede habitual do HC Liceo, outros equipos como o Básquet Coruña xogan tamén os seus encontros como locais neste recinto. É ademais empregado como escenario para outras competicións deportivas, como boxeo (disputándose a final do campionato de Europa no 2011) ou esgrima.

Características e instalacións

Encontro de hóckey a patíns entre o Liceo da Coruña e o FC Barcelona.

A construción do pavillón comezou en novembro de 1968, sobre unha superficie de 5.840 m², baixo a dirección do arquitecto municipal Santiago Rey Pedreira.

A pista polideportiva central do Pazo dos Deportes de Riazor é de parqué, e está preparada para disputar encontros de diversas disciplinas deportivas como hóckey a patíns, baloncesto, balonmán etc. Conta ademais cunha pista sintética de catro rúas para a práctica do atletismo, así como tres ximnasios, sala de judo, sala de musculación e sala de esgrima, así como nove vestiarios e sala de prensa.

O pavillón foi remodelado no 2011 cun investimento de 2,4 millóns de euros. A súa capacidade é de 4.425 espectadores, aínda que durante a época dourada do HC Liceo rexistraba entradas que podían achegarse aos 10.000 espectadores, se ben na actualidade unicamente rexistra grandes entradas nos partidos importantes do Liceo.