Partido Socialista Unificado de Alemaña

O Partido Socialista Unificado de Alemaña (en alemán: Sozialistische Einheitspartei Deutschlands, SED) foi un partido político alemán. Gobernou a República Democrática Alemá dende a súa fundación o 7 de outubro de 1949 até as eleccións do 18 de marzo de 1990.

Sozialistische Einheitspartei Deutschlands Partido Socialista Unificado de Alemaña
Partido gobernante da antiga RDA
Mocidades	Freie Deutsche Jugend
Filiación internacional	Kominform
Historia
Fundación	1946
Disolución	1990
Precedido por	Partido Comunista Partido Socialdemócrata
Sucedido por	Die Linkspartei
Posicións políticas
Ideoloxía	Comunismo Marxismo-leninismo
Publicación	Neues Deutschland

Historia

O SED foi fundado en abril de 1946 mediante a unificación do Partido Comunista de Alemaña (KPD) e o Partido Socialdemócrata de Alemaña (SPD) na zona soviética de ocupación de Alemaña tras a segunda guerra mundial. O resultado foi a creación dun partido poderoso, con máis de 1.260.000 afiliados. En outubro dese mesmo ano celebráronse eleccións e a SED obtivo case o 50% dos votos en Alemaña Oriental. O SED formou seguidamente o Fronte Nacional de Alemaña Democrática coa Mocidade Libre Alemá, a Federación Alemá de Sindicatos Libres e as organizacións democristiás e liberais do Leste.

Carné de membro do SED.

Esta coalición unitaria, controlada na práctica polo SED, ocupou os escanos da Cámara do Pobo da RDA até as eleccións de 1990. A finais dos anos 1980, o Partido Socialista Unificado contaba con 2,8 millóns de militantes e exercía o control total da vida política do país. O seu secretario xeral era o primeiro gobernante da República e o seu diario, Neues Deutschland (Nova Alemaña), un dos máis lidos. Os seus secretarios xerais durante este período foron Wilhelm Pieck (1946-1950), Walter Ulbricht (1950-1971), Erich Honecker (1971-1989) e Egon Krenz (1989).

Tras a caída do Muro de Berlín en novembro de 1989 e o esborrallamento de tódalas estruturas de poder da República Democrática Alemá, a SEDE cambiou a súa denominación pola de Partido do Socialismo Democrático (PDS) e perdeu o 95% da militancia. En 2005 cambiou a súa denominación a Partido da Esquerda e obtivo os mellores resultados electorais desde 1989.

Sección de Berlín Oeste

Inicialmente, o SED tiña unha sección en Berlín Oeste, mais en 1962 esta sección converteuse nun partido autónomo chamado o Partido Socialista Unificado de Berlín Oeste (en alemán: Sozialistische Einheitspartei Westberlins, SEW).

Secretarios Xerais do Comité Central do SED

Foron tamén coñecidos como "Primeiro Secretario" entre 1953 e 1976.

• Walter Ulbricht (xullo de 1950 - 3 de maio de 1971)
• Erich Honecker (3 de maio de 1971 - 18 de outubro de 1989)
• Egon Krenz (18 de outubro de 1989 - 3 de decembro de 1989)

Véxase tamén

Outros artigos

• Die Linke
• República Democrática Alemá
• Partido Comunista de Alemaña
• Partido Socialdemócrata de Alemaña

Ligazóns externas

• Sozialistische Einheitspartei Deutschlands en Chronik der Wende (en inglés)
• RFE/RL East German Subject Files: Communist Party (en inglés)