Modulador selectivo do receptor de estróxeno

En farmacoloxía, un modulador selectivo dos receptores de estróxeno (coñecido tamén polo acrónimo MSRE ou en inglés SERM) é un composto que se une ós receptores estroxénicos das células, simulando a actividade dos estróxenos en certos tecidos, mentres que inhiben a súa acción noutros. Algúns elementos desta clase de fármacos utilizáronse clinicamente durante décadas e recentemente demostrouse a súa especificidade tisular. A maior parte son compostos non esteroides con estrutura terciaria, o que lles permite interactuar co receptor estroxénico para poder equiparar os efectos do estróxeno sobre algúns tecidos, mentres manifestan efectos antiestroxénicos sobre outros.

Aviso médico

Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.

Clasificación

Existen unha gran cantidade de medicamentos con propiedades para interactuar selectivamente sobre os receptores estroxénicos. Para facilitar o seu estudo, foron catalogados en catro grupos:

• 1) os derivados do trifeniletileno, como o tamoxifeno, o citrato de clomifeno (MSRE de primeira xeración) e o toremifeno, o droloxifeno e o idoxifeno (MSRE de segunda xeración);
• 2) outros compoñentes non esteroides como o raloxifeno (MSRE de segunda xeración) e o arzoxifeno, o ospemifeno (MSRE de terceira xeración), e o ormeloxifeno, o lasofoxifeno, o pipendoxifeno e o bazedoxifeno;
• 3) compoñentes esteroides como o fulvestrant, e
• 4) fitoSERMs, como a xenisteína.