Maruxa Villanueva

María Isaura Vázquez Blanco, coñecida como Maruxa Villanueva, nada na Barrela (Lousada, Carballedo) o 6 de maio de 1906 e finada en Santiago de Compostela o 24 de novembro de 1998, foi unha actriz galega.

Maruxa Villanueva
Nacemento	6 de maio de 1906
Lugar de nacemento	A Barrela
Falecemento	24 de novembro de 1998
Lugar de falecemento	Santiago de Compostela
Nacionalidade	España
Ocupación	actriz
Cónxuxe	Manuel Daniel Varela Buxán
Premios	Medalla Castelao
[ editar datos en Wikidata ]

Traxectoria

Emigrou a Arxentina con 20 anos, e alí fíxose cantante e actriz, tamén colaborou nas actividades culturais dos emigrados galegos en Buenos Aires e nos actos en favor da República. Casou con Manuel Daniel Varela Buxán e con el formou a Compañía Gallega de Comedias Marujita Villanueva, coa que estreou Os vellos non deben de namorarse. Na Arxentina trabou amizade con Salvador de Madariaga, Eduardo Blanco Amor, Fernando Iglesias "Tacholas" e Alfonso Daniel Rodríguez Castelao.

En 1949 regresou a Galicia onde montou a compañía Os Labregos, pero a censura franquista rematou coa súa actividade, e volveu a Buenos Aires en 1958. En 1962 retornou definitivamente a Galicia. En 1971 o presidente da Fundación Rosalía de Castro, Agustín Sixto Seco, propúxolle atender a Casa Museo Rosalía de Castro, da que foi coidadora ata o seu pasamento, e onde viviu a partir de 1974. Dedicou o seu tempo á casa e á obra de Rosalía e converteuse en especialista no tema.

Recoñecementos

Recibiu numerosos premios e homenaxes, entre eles a Medalla Castelao da Xunta de Galicia e o Premio María Casares de teatro a título póstumo.

En 2001 o concello de Padrón creou o premio Maruxa Villanueva.

Placa en Padrón

Figura na galería de Personaxes ilustres do concello de Carballedo no que unha rúa leva o seu nome, o mesmo ca en Padrón.

Forma parte da galería de personaxes ilustres de Carballedo.

Véxase tamén

Bibliografía

• Biscainho-Fernandes, Carlos-Caetano (2022). "The Emancipatory Praxis of Women in Galician Emigration and Exile Theatre in Buenos Aires during the Mid-Decades of the Twentieth Century" (PDF). Humanities. 11(4): 85: 1-10. 
• "Vázquez Blanco, María Isaura". Dicionario biográfico de Galicia 3. Ir Indo Edicións. 2010-2011. p. 290. 
• "Vázquez Blanco, María Isaura". Enciclopedia Galega Universal. Ir Indo. 1999-2002. ISBN 84-7680-288-9. 
• "Villanueva, Maruxa". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 
• Marco, Aurora (2007). Dicionario de Mulleres Galegas [Das orixes a 1975]. Edicións A Nosa Terra. ISBN 978-84-8341-146-9. 

Ligazóns externas

• Biografía na páxina web da Fundación e Casa Museo Rosalía de Castro.
• Cid Galante, Rosa María (25/10/2017). "Maruxa Villanueva" Historia das nosas mulleres ourensás.
• "Maruxa Villanueva". no Álbum de Mulleres do Consello da Cultura Galega.