Manuel García Cambón

Manuel García Cambón, nado en Logrosa (Negreira) o 27 de novembro de 1907 e finado en Santiago de Compostela o 25 de maio de 1990, foi un empresario galego.

Manuel García Cambón

Biografía
Nacemento	27 de novembro de 1907 Negreira, España
Morte	25 de maio de 1990 (82 anos)
Actividade
Ocupación	empresario
Familia
Fillos	Manuel García Baliña

Traxectoria profesional

Foi o segundo de sete irmáns e quedou orfo de nai aos 12 anos. Aos catorce anos empezou a traballar como aprendiz de carpinteiro no taller dun veciño. Un ano despois empezou a dedicarse ao serrado de madeira no monte. Fundou en 1931 o seu primeiro serradoiro en Negreira e en 1946 creou FINSA unha empresa de explotación e transformación de madeira que terá o seu nicho de negocio no financiamento: a empresa, acrónimo de Financiera Maderera, SA, mercaba a madeira aos propietarios dos montes ao longo de toda a fase de crecemento das árbores, o que lle permitía fidelizar o vendedor e realizar investimentos máis baixos e continuados. Esta forma de negocio resultou rendible e en 1964, montou unha fábrica de taboleiro de madeira en Pontecesures e cinco anos máis tarde, en 1969, abriu a planta central en Santiago de Compostela. A finais dos setenta comeza o seu despregamento coa compra de firmas do sector, como a ourensá Oremberg, ou posteriormente Foresa.

Foi tamén presidente da Asociación Técnica de Investigación das Industrias da Madeira (AITIM), unha asociación de normalización do sector madeireiro español, entre 1983 e 1987.

Finou en Santiago de Compostela o 25 de maio de 1990.

Vida persoal

Casou con Sara Baliña Pérez. Ao seu falecemento, a maior parte das accións da firma foron herdadas polos seus fillos Manuel García Baliña, que o sucedeu como presidente, e Santiago García Baliña. Volveu casar con María Cristina Villar Fernández.

Véxase tamén

Bibliografía

• Rico Boqueta, Eduardo (2006). "De serrador a empresario" in Empresarios de Galicia. CIEF Centro de Investigación Económica e Financeira; Fundación Caixa Galicia. pp. 461–479.