Luka Brajkovic

Luka Brajkovic
	;
Biografía
Nacemento	26 de xuño de 1999 (25 anos); Feldkirch, Austria (pt)
Educación	Davidson College (en)
Actividade
Ocupación	baloncestista
Deporte	baloncesto
Liga	Baloncesto masculino da División I da NCAA
2018–2020
Traxectoria

Luka Brajkovic (en serbocroata: Luka Brajković), nado o 26 de xuño de 1999 en Feldkirch, Vorarlberg, é un xogador profesional de baloncesto austríaco. Cunha altura de 2,08 m xoga na posición de ala-pivote.^[1] Formado na Universidade Davidson, en 2022 foi seleccionado como mellor xogador da Conferencia Atlantic 10. Actualmente xoga para o Río Breogán da Liga ACB.

Traxectoria

Nado en Feldkirch, no estado austríaco de Vorarlberg, Brajkovic comezou a xogar ao baloncesto na súa cidade natal. En 2015, con 16 anos, asinou cos Dornbirn Lions da 2. Basketball-Bundesliga, a segunda categoría do baloncesto do seu país.^[2] Durante a temporada fixo unha media 14,4 puntos, 8,7 rebotes e 2,2 tapóns por xogo. Grazas ao seu rendemento, varias universidades estadounidenses amosaron interese polo novo xogador. No verán de 2017, Brajkovic visitou o Davidson College, mais decidiu continuar o seu desenvolvemento en Dornbirn. Brajkovic tamén considerou trasladarse a Alemaña ao finalizar a temporada, mais finalmente non ocorreu.

En marzo de 2018, comprometeuse a xogar ao baloncesto universitario para Davidson, aínda que tamén dispuña de ofertas de Stanford, Purdue e Penn State. Escolleu os Wildcats en parte porque o adestrador Bob McKillop viaxou a Austria dúas veces para recrutalo. No seu primeiro ano nos Estados Unidos, xogou 34 partidos co equipo, cunha media de 11,1 puntos e 6 rebotes por encontro. Na súa última temporada nos Estados Unidos, a 2021−22, Brajkovic fixo unha media de 14,4 puntos, 7,1 rebotes e 2,5 asistencias por encontro, cunha media de lanzamento de tres puntos do 41%. Grazas a isto foi nomeado mellor xogador da Conferencia Atlantic 10.