Liña de alta velocidade La Sagra-Toledo

A liña de alta velocidade La Sagra-Toledo é unha liña de alta velocidade da rede de ferrocarril en España de 21 km de lonxitude que comeza na liña de alta velocidade Madrid-Sevilla na bifurcación de La Sagra e chega á cidade de Toledo.

Características

Os trens que actualmente percorren a liña utilizan os primeiros 54 km da liña de alta velocidade Madrid-Sevilla ata La Sagra e despois collen o ramal exclusivo de 21 km de lonxitude ata Toledo. A parte nova da liña foi deseñada para admitir velocidades máximas de 270 km/h, que é tamén a velocidade máxima admitida polo tronco común que comparte coa LAV Madrid-Sevilla/Málaga.^[1] Como todas as liñas de alta velocidade españolas ten un ancho de vía de 1435 mm e está electrificada a 25 kV de corrente alterna.

No seu traxecto atópase un viaduto de 1602 m de lonxitude que salva o río Texo e o arroio Valdecaba, que constitúe a obra máis destacada da liña.^[2]

Estacións

A única estación do ramal é a estación de Toledo, de carácter terminal. A chegada dunha LAV a Toledo fixo evidente a necesidade de adaptar a estación ás novas necesidades. Todo iso fíxose rehabilitando o edificio histórico da estación de Toledo que foi proxectado polo arquitecto Narciso Clavería en estilo neomudéjar, e inaugurado en 1919.

Así mesmo os clientes dispoñen entre outros servizos dun aparcadoiro ao aire libre, asfaltado e iluminado que se estende sobre unha superficie de 7.500 m cadrados e capacidade para 325 prazas.^[2]

Servizos

Por esta liña circulan trens da serie 104, operando o servizo comercial Renfe Avant. Dende a apertura da nova LAV Madrid-Levante en decembro de 2010, introduciuse un servizo AVE realizando o percorrido Toledo-Madrid-Cuenca-Albacete, sendo operado por trens da nova Serie 112. Non obstante, o devandito servizo eliminouse en xullo de 2011, debido á escasa demanda que recibía.

Notas

↑ "Características da liña en Ferropedia". Arquivado dende o orixinal o 20 de xullo de 2011. Consultado o 25 de xullo de 2011.
↑ ^2,0 ^2,1 Detalles da liña en Web Site de ADIF.

Véxase tamén

Ligazóns externas

Información da liña na web de Adif Arquivado 13 de maio de 2015 en Wayback Machine. (en castelán)

[1] "Características da liña en Ferropedia". Arquivado dende o orixinal o 20 de xullo de 2011. Consultado o 25 de xullo de 2011.

[adif.es-2] 2,0 ^2,1 Detalles da liña en Web Site de ADIF.

[1]

[2]