Lambetada

Unha lambetada ou lambonada é un alimento doce que se toma máis por gusto ca para alimentarse. Caracterízase por ter azucres ou adozantes como ingredientes principais. Ao contrario que os pasteis ou as tortas, que se adoitan compartir con outras persoas como sobremesa despois dunha comida, as lambonadas cómense de xeito casual como petisco e moitas veces coas mans.

Lambetadas variadas nunha tenda.

Con escaso ou nulo valor nutritivo en proteínas, vitaminas e minerais, o seu consumo en exceso é un mal hábito que está espallado especialmente entre os cativos e que pode desencadear problemas de saúde como a obesidade, diabetes e mesmo anemia, xa que aporta pouco ferro á dieta e ocasiona a perda de apetito por alimentos realmente nutritivos.

Outros nomes

En galego tamén se coñece como larpeirada, lamberetada, lambeta, lambiscada, peperetada ou peperete.

Tipoloxía

As lambetadas poden clasificarse en cristalinas e non cristalinas. As non cristalinas son homoxéneas e poden ser gomosas ou duras. Nelas inclúense os caramelos, toffees e nougats, entre outros. As cristalinas teñen pequenos cristais na súa estrutura que se derreten na boca ou que son facilmente mastigábeis.

Lambetadas de azucre

• Comparación de lambetadas de azucre
• 
  Kompeitō é unha lambonada tradicional do Xapón. Componse case dun 100% de azucre.
• 
  Caramelos con forma de froita.
• 
  Chikki é un doce crocante caseiro moi popular na India.
• 
  En Alemaña, os osiños Haribo foron as primeiras lambetadas de goma da historia.
• 
  Pantteri é unha larpeirada finesa. As de cores teñen sabor de froita e as negras de regalicia.

Chocolate

• Comparación de tipos de chocolate
• 
  O chocolate amargo contén pouco azucre.
• 
  O chocolate con leite contén leite e menos cacao en po.
• 
  O chocolate branco non leva cacao en po.
• 
  O sucedáneo do chocolate emprégase no canto de chocolate puro para reducir custos.
• 
  Flores feitas de chocolate.