Lutz Ilisch
Lutz Ilisch, nado en 1950 en Billerbeck, Renania do Norte-Westfalia, é un numismático alemán especialista na moeda medieval do mundo islámico.[1]
| Biografía | |
|---|---|
| Nacemento | 1950. Billerbeck, Alemaña  |
| Datos persoais | |
| País de nacionalidade | Alemá |
| Educación |  Universidade de Münster. |
| Coñecido por | Moeda medieval do mundo islámico. |
| Actividade | |
| Campo de traballo | Numismática. |
| Ocupación | arabista , numismático |
| Influencias | |
| Lingua | Lingua alemá |
| Premios | |
| - (1979): Medalla da RNS. - (1995): Premio Samir Shamma (RNS). | |
É o irmán máis novo do tamén numismático e historiador Peter Ilisch.
Traxectoria editar
Logo da súa educación secundaria en Münster, Ilisch cursou Estudos Árabes, Prehistoria e Historia Temperá, así como Ciencias Auxiliares da Historia (especialidade de Numismática) na Universidade de Münster. En 1979 graduouse e recibiu o título de Magister Artium, cunha tese sobre moedas de ofrenda no mundo islámico. Finalmente, en 1985 acadou o seu doutoramento cunha tese sobre a historia do goberno dos artúquidas de Mardin entre mamelucos e mongois, de 1260 a 1410.[1][2]
Como alumno de Peter Berghaus, participou temporalmente no desenvolvemento do proxecto Corpus Nummorum Saeculorum IX-XI qui in Suecia reperti sunt, de catalogación dos tesouros de época viquinga en Suecia, que contiñan importantes cantidades de moedas procedentes do mundo islámico.[1]
Logo da súa graduación, IIlisch tivo contacto coa numismática desde o punto de vista comercial. En 1979 e 1980 colaborou co comerciante de moedas Holger Dombrowski e a partir de 1985 traballou na compañía Münzen und Medalen AG, en Basilea.[1]
Nesa época compaxinou o traballo no sector privado coa docencia na Universidade de Basilea, en Suíza, e na Universidade de Friburgo, en Alemaña.[1]
Posteriormente Ilisch ingresou como profesor de Numismática e de Estudos Islámicos na Universidade de Tubinga. Alí fundou o Centro de Investigación de Numismática Islámica, que dirixiu entre 1990 e 2018.[3] Co apoio económico da Volkswagen Foundation, a universidade adquiriu en 1990 a colección completa de moeda islámica do estadounidense Stephen Album, con arredor de 30.000 exemplares. Baixo a dirección de Ilisch, a colección de moeda islámica instalouse no museo da universidade e foise incrementando ata se converter nunha das máis importantes do mundo no seu xénero, con arredor de 65.000 pezas.[4][5] Esta colección foi publicada dentro da serie Sylloge Numorum Arabicorum Tübingen; os volumes dedicados ás moedas de Palestina e ás de Gazna/Cabul foron galardoados co premio á mellor publicación do ano tanto pola Royal Numismatic Society, de Londres, como pola American Numismatic Society, de Nova York.[1]
Ilisch foi tamén asesor de numismática islámica na Comisión de Numismática dos Estados da República Federal de Alemaña.[1]
Recoñecementos editar
- (1995): Premio Samir Shamma, da Royal Numismatic Society, de Londres.[6]
- (2017): Medalla da Royal Numismatic Society.[7]
Publicacións editar
- (1985). Die Geschichte der Artuqidenherrschaft von Mardin zwischen Mamluken und Mongolen 1260-1410 AD. Universität, Münster.
- (1993). Palästina IVa. Bilad aš-Šam I (Sylloge Numorum Arabicorum Tubingen). Ernst Wasmuth, Tubinga. ISBN 3-8030-1100-0
- (2003). Dirham und Rappenpfennig: Mittelalterliche Münzprägung in Bergbauregionen (con S. Lorenz, W. B. Stern e H. Steuer). Habelt, Bonn. ISBN 3-7749-3086-4
- (2005). Die mittelalterlichen Fundmünzen, Siegel und Gewichte von Santueri, Mallorca. Münzgalerie München. ISBN 978-3926195029
- (2004). Dirham und Rappenpfennig 2: Mittelalterliche Münzprägung in Südwestdeutschland (con S. Lorenz, W. B. Stern e H. Steuer).Habelt, Bonn. ISBN 3-7749-3299-9
- (2015). Die Münzstätte Damaskus, von den Umayyaden bis zu den Mongolen (Sylloge Numorum Arabicorum Tubingen). Ernst Wasmuth, Tubinga. ISBN 9783803011046
Notas editar
- ↑ 1,0 1,1 1,2 1,3 1,4 1,5 1,6 "Ilisch, Lutz". En Coins Weekly. 16 de novembro de 2016.
- ↑ Véxase (1985) en "Bibliografía".
- ↑ "Forschungsstelle für islamische Numismatik Tübingen (FINT)". uni-tuebingen.de (en alemán). Consultado o 24 de outubro de 2020.
- ↑ Kampmann, Ursula (8 de xullo de 2015). "Luts Ilisch celebrates his 65th birthday". coinsweekly.com (en inglés). Consultado o 24 de outubro de 2020.
- ↑ "Münzsammlung der Islamischen Numismatik Arquivado 18 de outubro de 2020 en Wayback Machine.". Universitätssammlungen in Detschland.
- ↑ "The Samir Shamma Prize for Islamic Numismatics". numismatics.org.uk (en inglés). Consultado o 24 de outubro de 2020.
- ↑ "The Society’s Medal". Royal Numismatic Society.
Véxase tamén editar
Bibliografía editar
- "Ilisch, Lutz". En Coins Weekly. 16 de novembro de 2016.
- Kampmann, U. (2015). "Lutz Ilisch celebrates his 65th birthday". En Coins Weekly. 8 de xullo.
- Meyer, C. (2014). "Silberschatz für Bernstein und Sklaven". En Stuttgarter Nachrichten. 2 de febreiro.