José Vázquez Grela

José Vázquez Grela, nado en Ames o 6 de xullo de 1886^[1] e finado en Nigrán o 12 de setembro de 1936, foi un mestre, agrarista e xornalista galego.

Traxectoria Editar

José Vázquez Grela cos seus alumnos premiados pola FAR da Estrada en Buenos Aires, 1930.

Emigrou a América. Ao retornar instalouse en Cuntis, onde participou no movemento agrario, ocupando o cargo de xefe das sociedades agrarias de Cuntis, foi redactor de El Bólido e colaborou en Acción Agraria. Despois fundou El Bólido de Cuntis. Rematou a carreira de Maxisterio en 1920^[2]. Foi mestre interino no Porriño e Mesego (Cuntis). Na ditadura de Primo de Rivera foi mestre en Graba (Silleda) e Santa Cristina de Vea (A Estrada). En 1931 pediu traslado para Nigrán. Pertenceu á directiva da Asociación de Trabajadores de la Enseñanza de Vigo e foi membro da Agrupación Socialista de Vigo. Na folga xeral revolucionaria de 1934 foi detido e estivo dous meses preso. Participou na campaña do Estatuto de Autonomía. Logo do golpe de Estado do 18 de xullo de 1936 foi detido e paseado no Barrio da Devesa de Nigrán o 12 de setembro.

Casou con Josefa Iglesias, natural de Cuntis, coa que tivo seis fillos: María Asunción, Antonio Manuel, Julia, Alfredo e José Gonzalo.

↑ Primer escalafón de maestros de escuelas nacionales existentes en 31 de diciembre de 1933. Madrid: Ministerio de Instrucción Pública y Bellas Artes. 1934. p. 58.
↑ El Noticiero Gallego, 4-6-1920, p. 4.

Méixome, Carlos (2021). Catas na memoria. A persecución franquista no Val de Miñor. Santiago de Compostela: Laiovento. pp. 34–52. ISBN 978-84-8487-506-2.