José María Fuentes
José María Fuentes Fernández, coñecido como Chema Fuentes, nado en Outes cara a 1952 e finado en Santiago de Compostela o 4 de decembro de 1972, foi un estudante galego.
| Biografía | |
|---|---|
| Nacemento | 1952  Outes, España |
| Morte | 4 de decembro de 1972 (19/20 anos) Santiago de Compostela, España |
| Causa da morte | homicidio, ferida por arma de fogo |
| Actividade | |
| Ocupación | estudante universitario |
Traxectoria
editarFillo do médico Fernando Fuentes Rolao e de Fanny Fernández Hermoso. Fixo o bacharelato no colexio La Salle. Estudante de Medicina da Universidade de Santiago de Compostela, o sábado 4 de decembro de 1972 saíu a cear en Compostela cos compañeiros de facultade, e despois foron a roldar como membros da tuna a unhas compañeiras que vivían nunha residencia na rúa Doutor Teijeiro, preto da clínica Álvarez. O subinspector da policía nacional de paisano Luis Miguel Quiroga Bouzo disparoulle de socato e polas costas, e faleceu practicamente no acto. A versión oficial afirmaba que os axentes da Policía nacional perseguían uns ladróns, dispararon ao aire e un dos tiros alcanzou accidentalmente a José María Fuentes.[1] Logo da súa morte houbo mobilizacións na universidade, cortes de tráfico, cócteles molotov, pechouse a universidade e a presión social obrigou a que se recoñecesen os feitos.[2] O seu enterro en Outes constituíu unha manifestación multitudinaria.[3]
O policía autor da morte foi trasladado a Ourense, pero a instancias do Xulgado de Instrución de Santiago de Compostela foi detido tres días despois e quedou retido nos calabozos da comisaría. Foi acusado de asasinato con aleivosía e xulgado na Audiencia Provincial da Coruña o 3 de xullo de 1973 con presenza de correspondentes de prensa estranxeiros.[4] Foi considerado culpable dun delito de homicidio coa agravante de abuso de superioridade pola súa condición de membro das forzas de orde e por portar unha arma; cualificandose a súa acción como “un exceso de celo no exercicio das súas funcións” ao considerar que “non se requiría o uso da forza” e moito menos o emprego “da arma reglamentaria” que portaba. Foi condenado a 17 anos, 4 meses e 1 día de cadea e a indemnizar á familia da vítima con 700 000 pesetas, que tivo que desembolsar o Goberno franquista pois os xuíces consideraron ao Estado responsable civil subsidiario.[5] En 1977 recibiu a liberdade condicional.[6]
Homenaxe
editarO 4 de decembro de 2022, no seu 50 cabodano, a asociación Terra de Outes e o Concello de Outes organizaron un acto de homenaxe no que participaron familiares, veciños e representantes da sociedade civil. O alcalde Manuel González López leu unha declaración institucional condenando o asasinato de Chema Fuentes e en defensa dos valores da democracia e dos dereitos humanos. Descubriuse unha placa conmemorativa na praza da Cruz da Serra, nas inmediacións da casa familiar de Chema Fuentes.[7]
Notas
editar- ↑ "Nota del Gobierno civil sobre la muerte de un joven por un disparo, en Santiago", La Voz de Galicia, 5-12-1972, p. 13.
- ↑ "Ayer no hubo clases en la mayor parte de las facultades de Santiago", La Voz de Galicia, 7-12-1972, p. 19.
- ↑ "Gran manifestación de duelo en el sepelio del estudiante don José María Fuentes", La Voz de Galicia, 6-12-1972, p. 22.
- ↑ "El día 3 de julio se celebrará el juicio por la muerte de un estudiante en Santiago", La Voz de Galicia, 13-6-1973, p. 4.
- ↑ "Diecisite años de reclusión para el autor de la muerte de un estudiante, en Santiago", La Voz de Galicia, 12-7-1973, p. 17.
- ↑ Ministerio de Xustiza (16 de decembro de 1977). "ORDEN de 16 de noviembre de 1977 por la que se concede la libertad condicional a 21 penados" (PDF). Boletín Oficial del Estado (300): 27485.
- ↑ Pouso, Esperanza (4 de decembro de 2022). "Outes descubre una placa en recuerdo de Chema, un joven asesinado en 1972". El Correo Gallego (en castelán).
Véxase tamén
editarBibliografía
editar- García Suárez, Xoán Fco. (abril 2008). "Na memoria de José María “Chema” Fuentes" (PDF). Terra de Outes (2): 6–7.
Ligazóns externas
editar- José Antonio Pérez, Esperanza Pouso, Javier Rosende e Carlos Casal (27 de marzo de 2021). "La muerte del joven que levantó a la USC y Santiago contra el franquismo". El Correo Gallego (en castelán).
- "Entrevista a Fernando Fuentes". YouTube. Consultado o 2022-08-27.