José Luis Artetxe
José Luis Artetxe Muguire, nado en Algorta o 28 de xuño de 1930 e finado en Biscaia o 19 de marzo de 2016,[1] foi un futbolista español, que xogaba de extremo dereito. Xogador histórico do Athletic Club, desenvolveu toda a súa carreira profesional no club bilbaíno, disputando 350 partidos oficiais, nos que marcou 137 goles. É o noveno máximo goleador da historia do club.
| Artetxe | |||
|---|---|---|---|
| Información persoal | |||
| Nome | José Luis Artetxe Muguire | ||
| Nacemento | 28 de xuño de 1930 | ||
| Lugar de nacemento | Getxo | ||
| Falecemento | 19 de marzo de 2016 | ||
| Altura | 1,74 m. | ||
| Posición | Extremo dereito | ||
| Carreira xuvenil | |||
| 1947–1949 | Munguia | ||
| Carreira sénior | |||
| Anos | Equipos | Aprs | (Gls) |
| 1949–1965 | Athletic Club | 274 | (105) |
| 1949–1950 | → Getxo | ||
| Selección nacional | |||
| 1953 | España B | 1 | (0) |
| 1954–1959 | España | 6 | (1) |
|
Partidos e goles só en liga doméstica. [ editar datos en Wikidata ] | |||
En 1956 converteuse no primeiro futbolista español en marcar un triplete na Copa de Europa.
Traxectoria editar
Athletic Club editar
Comezou a xogar ao fútbol no Munguía, ata que en 1949 foi fichado polo Athletic Club e este cedeuno na súa primeira tempada ao Getxo da súa vila natal, equipo da Terceira División.[2] Na tempada 1950/51 debutou co Athletic en partido oficial, concretamente o 10 de setembro de 1950, nunha vitoria por 4-0 sobre Atlético de Madrid. Marcou o seu primeiro tanto coa camiseta branca e vermella no seu terceiro partido, contra o Real Madrid.
Militou no club bilbaíno durante un total de 15 tempadas, contabilizando 350 partidos oficiais e 137 goles, o que o sitúa como o noveno máximo goleador da historia do club. Durante anos formou unha popular dianteira xunto a Markaida, Arieta I, Uribe e Gaínza.[3]
Gañou co Athletic unha liga, tres Copas do Xeneralísimo e unha Copa Eva Duarte. A súa tempada máis prolífica foi a 1955/56, con Ferdinand Daučík no banco, na que marcou un total de 21 goles e se proclamou campión de liga e de Copa. Ao ano seguinte debutou xunto ao club na Copa de Europa e converteuse no primeiro futbolista español en marcar un triplete na competición, ao lle meter tres goles ao Porto.[4] A día de hoxe mantense como o máximo goleador histórico do Athletic na máxima competición continental, con 5 goles.[5][6]
Selección española editar
Foi seis veces internacional coa selección española, coa que debutou o 17 de marzo de 1954 no imporante partido ante Turquía no estadio Olímpico de Roma, que decidía cal dos dous equipos disputaría o Mundial de 1954. Artetxe abriu o marcador, pero o encontro rematou con empate a dous goles e decidiuse a favor do equipo turco por sorteo a través da man inocente dun neno de 10 anos.[7]
Disputou o seu último partido internacional o 17 de decembro de 1959, contra Francia.
Trala retirada editar
Mentres xogaba no Athletic estudou para perito industrial e montou unha fábrica de pensos en Mungia, á que se dedicou despois de colgar as botas.[2]
Notas editar
- ↑ "Fallece el exjugador del Athletic José Luis Artetxe" (en castelán). 20 de marzo de 2016. Consultado o 7 de setembro de 2022.
- ↑ 2,0 2,1 Rodrigálvarez, Eduardo (20 de marzo de 2016). "Muere Artetxe, el aldeano ilustrado". El País (en castelán). ISSN 1134-6582. Consultado o 7 de setembro de 2022.
- ↑ Salazar, Bernardo (2 de marzo de 2016). "Las tres grandes delanteras que hubo en la historia el Athletic". As (en castelán). Consultado o 7 de setembro de 2022.
- ↑ "José Luis Artetxe, triste adiós a un rebelde con causa". Deia (en castelán). 20 de marzo de 2016. Consultado o 7 de setembro de 2022.
- ↑ Rivas, Jon (19 de marzo de 2016). "Muere José Luis Artetxe, leyenda del Athletic de los 50". El Mundo (en castelán). Consultado o 7 de setembro de 2022.
- ↑ Velasco, Juanma (19 de marzo de 2016). "Fallece José Luis Artetxe". Marca (en castelán). Consultado o 7 de setembro de 2022.
- ↑ Pérez, Eliézer (25 de marzo de 2009). "Aquel España-Turquía de 1954". Marca (en castelán). Consultado o 8 de setembro de 2022.
Véxase tamén editar
Ligazóns externas editar
- Datos do xogador no sitio web do Athletic Club (en castelán).
- Datos do xogador coa selección española (en castelán).