Ipatii Potii
Ipatii Potii (en ucraíno: Іпатій Потій; en polaco: Hipacy Pociej; en belaruso: Іпацій Пацей), nado o 12 de agosto de 1541 en Różanka e finado o 8 de xullo de 1613 en Vlodymyr-Volynskyi, foi un eclesiástico grecocatólico ucraíno, escritor, polemista e teólogo, que tivo un importante papel na Unión de Brest e que foi metropolita de Kíiv e Galicia dende 1599 até a súa morte en 1613.
.jpg)
Traxectoria editar
Primeiros anos editar
Naceu o 12 de agosto de 1541 en Różanka,[1][2] no voivodato de Lublin, no seo dunha familia nobre.[1] A súa nai, logo de enviuvar arredor de 1550, casou co gobernador da rexión de Smolensk. O príncipe Mikołaj Radziwiłł encargouse da súa educación, e enviouno a unha escola calvinista[1] e posteriormente á Universidade Iaguelónica de Cracovia.[1] En 1566 comezou a traballar como xuíz en Brest, en 1572 pasou e ser secretario do rei Sexismundo II e posteriormente recadador de impostos, e en 1588 castelán de Brest.[2] Foi tamén senador da Confederación Polaco-Lituana.[1]
Aínda que na súa mocidade se convertera ao calvinismo,[2] en 1573/1574 volveu á Igrexa Ortodoxa.[1][2] No mesmo ano casou con Anna, dos duques de Hołowniów-Ostrożeckich,[3] coa que tivo seis fillos.
Bispo de Volodymyr e Brest editar
Logo da morte da súa dona en 1592, Potii decidiu ingresar na vida relixiosa e converteuse en monxe, tomando o nome relixioso de Ipatii.[2][3] En 1593 foi nomeado bispo de Volodymyr e Brest,[1][2][3] e foi consagrado bispo o 6 de xuño de 1593 polo metropolita de Kíiv Michal Rahoza.
Ipatii Potii tivo un papel especialmente importante na Unión de Brest, pola que a metrópole ortodoxa de Kíiv (a igrexa ucraína) deixou de estar baixo a xurisdición da Igrexa Ortodoxa de Constantinopla para entrar en comuñón coa Igrexa Católica e situarse baixo xurisdición papal, formando o que hoxe é a Igrexa Católica Ucraína. Viaxou a Roma xunto co bispo de Lutsk Cyril Terlecki,[1][2][3] para entregarlle ao papa Clemente VII a petición de unión asinada polos bispos da metrópole en Brest o 12 de xuño de 1595.[1] Chegaron a Roma o 25 de novembro de 1595, e obtiveron a aprobación do papa á unión, podendo manter o rito bizantino e o resto de prácticas litúrxicas.[3] Volveron a Lutsk en marzo de 1596.
Metropolita de Kíiv editar
Logo da morte de Rahoza, Ipatii Potii foi nomeado metropolita de Kíiv en agosto de 1599[1][3] polo rei Sexismundo III, e confirmado polo papa Clemente VIII o 15 de novembro de 1600. Foi tamén nomeado arquimandrita do mosteiro das Covas de Kíiv, mais a oposición ortodoxa levouno a renunciar en 1605.[3] En 1601 fundou un seminario, e o 3 de marzo de 1605 foi formalmente recoñecido como o único metropolita de rito bizantino da Confederación Polaco-Lituana.
O 11 de xullo de 1609 algúns ortodoxos atentaron contra a súa vida, mais sen éxito.[2] Traballou tamén para reestruturar a Orde de San Basilio Magno. Finou o 18 de xullo de 1613 en Volodymyr-Volynskyi,[2] e enterrado na catedral da mesma cidade.
Notas editar
- ↑ 1,00 1,01 1,02 1,03 1,04 1,05 1,06 1,07 1,08 1,09 Kubiiovych, Volodymyr; Huzar-Struk, Danylo, eds. (1993). Encyclopedia of Ukraine (en inglés) 4. University of Toronto Press. p. 171. ISBN 9780802030092.
- ↑ 2,0 2,1 2,2 2,3 2,4 2,5 2,6 2,7 2,8 Dzięgielewski, Jan, ed. (1995). Encyklopedia historii Polski: dzieje polityczne 2. Morex. p. 143. ISBN 9788390412122.
- ↑ 3,0 3,1 3,2 3,3 3,4 3,5 3,6 Chodera, Janina; Kiryk, Feliks, eds. (2005). Słownik biograficzny historii Polski: L-Ż. Słownik biograficzny historii Polski 2 (Zakład Narodowy im. Ossolińskich). p. 1187. ISBN 9788304048577.
Véxase tamén editar
Bibliografía editar
- Volodymyr Kubiiovych, Danylo Huzar-Struk, ed. (1993). Encyclopedia of Ukraine (en inglés) 4. University of Toronto Press. p. 171. ISBN 9780802030092.
Potii, Ipatii
- Likowski, Edward (1907). Unia brzeska (r. 1596.) (en polaco). Skład Główny w Księgarni Gebethnera i Wollfa.
- Подокшин, Семён Александрович (2001). Іпацій Пацей : царкоўны дзеяч, мысліцель, пісьменнік на пераломе культурна-гістарычных эпох (en belaruso). Minsk: Беларуская навука. ISBN 9789850803931.
- Назарко, Іриней-Іван Іванович (1962). Київські і Галицькі митрополити: біографічні нариси (1590-1960). Analecta OSBM. Serie 2. Sectio 1. Roma. OCLC 54007358.
Ligazóns externas editar
| Dignidades da Igrexa católica | ||
|---|---|---|
| Predecesor: (Unión de Brest) |
Bispo de Volodymyr e Brest 1596 - 1613 |
Sucesor: Yoakym Morokhovskyi |
| Predecesor: Michal Rahoza |
Metropolita de Kíiv, Galicia e toda a Rus 1599 - 1613 |
Sucesor: Yosyf Rutskyi |