Independientes por Vimianzo
Independientes por Vimianzo foi un partido político local fundado en 2011 polo daquela entón alcalde socialista de Vimianzo Alejandro Rodríguez Lema. Formalmente foi inscrito o 31 de xaneiro de 2011 no rexistro de partidos do Ministerio do Interior de España[1][2].
| Independientes por Vimianzo (IxVimianzo) | |
|---|---|
| Partido de ámbito local | |
| Dirixentes e organización | |
| Líder | Alejandro Rodríguez Lema |
| Historia | |
| Fundación | 31 de xaneiro de 2011 |
| Posicións políticas | |
| Ideoloxía | Socialdemocracia Galeguismo Municipalismo |
| Representación | |
| Concelleiros en Vimianzo | 2 / 13 |
| Outros datos | |
| Sede | Rúa Blanco Rajoy, 34 2º andar, 15129 Vimianzo |
Xurdiu como unha escisión do PSdeG-PSOE vimiancés en torno ao alcalde Rodríguez Lema, expulsado en novembro de 2009 por mor das súas críticas á política de pactos do seu partido a nivel autonómico co BNG, partido que exercía unha dura oposición contra el en Vimianzo e que incluso chegou a negociar en 2007 un pacto de goberno co PPdeG para afastalo da alcaldía[3]. Alejandro Rodríguez Lema encabezou as listas nas eleccións municipais de 2011 co obxectivo de anovar na alcaldía unha lexislatura máis.
Finalmente foi derrotado polo BNG, sendo elixido alcalde o nacionalista Manuel Antelo Pazos co apoio do PSdeG-PSOE. Rodríguez Lema non chegou a tomar posesión da súa acta como concelleiro, sendo a portavoz do grupo a súa sobriña Mónica Rodríguez Ordóñez. En marzo de 2013, e habéndose rachado o acordo entre nacionalistas e socialistas en outubro de 2011, impulsarían unha moción de censura contra o alcalde xunto co Partido Popular e dous edís tránsfugas do PSdeG-PSOE, sendo un destes últimos quen a encabezaba. Porén dita iniciativa non sairía adiante tras ser anulada polos tribunais por irregularidades na súa tramitación[4].
De cara ás eleccións municipais de 2015 Mónica Rodríguez Ordóñez[5] foi a candidata a alcaldía. Os resultados foron peores cós dos anteriores comicios xa que, pese a que IxVimianzo se converteu no principal partido da oposición, perderon case dez puntos porcentuais e un edil, renovando Manuel Antelo a alcaldía, desta volta xa con maioría absoluta.
En xullo de 2018 os membros de IxVimianzo volveron ao PSdeG-PSOE, sendo Mónica Rodríguez cabeza de lista para as municipais do 2019[6], nas cales logrou a vitoria e foi elixida alcaldesa.
Resultados electorais editar
| Ano | Votos | Porcentaxe | Concelleiros | Candidato/a |
|---|---|---|---|---|
| 2011 | 1427 | 24,26 % | 3 | Alejandro Rodríguez Lema |
| 2015 | 818 | 15,98 % | 2 | Mónica Rodríguez Ordóñez |
Notas editar
- ↑ "Registro de Partidos Políticos". Ministerio del Interior del Gobierno de España. Arquivado dende o orixinal o 30-09-2017. Consultado o 27-06-2016.
- ↑ Coruña, La Opinión de A. "El alcalde de Vimianzo lidera un partido independiente para ´seguir al mando´". Consultado o 2016-06-27.
- ↑ PP y BNG de Vimianzo iniciaron sus contactos y Mouzo ve posible un pacto en Corcubión
- ↑ "O alcalde ao que lle medraron os ananos - Praza Pública". Praza Pública. Consultado o 2016-06-27.
- ↑ Cerqueiro, Redacción QPC, Ubaldo (2015-05-07). "Eleccións #24M: 6 listas na procura da estabilidade en Vimianzo". Arquivado dende o orixinal o 07 de agosto de 2016. Consultado o 2016-06-27.
- ↑ "O PSOE e IxVimianzo unen forzas con Mónica Rodríguez como candidata". Que pasa na costa. 2018-07-14. Arquivado dende o orixinal o 15 de xullo de 2018. Consultado o 2018-07-15.