Iberia Sport Club
O Iberia Sport Club foi un equipo de fútbol español da cidade de Zaragoza, en Aragón. O club foi fundado o 24 de marzo de 1917 e xogaba os seus partidos no Estadio de Torrero. En 1932 fusionouse co Zaragoza Club Deportivo, dando orixe ao Zaragoza Foot-ball Club, primeiro nome do actual Real Zaragoza.
| Nome | Iberia Sport Club | |
|---|---|---|
| Alcume(s) | Avispas | |
| Fundación | 1917 | |
| Desaparición | 1932 | |
| Estadio | Estadio de Torrero, Zaragoza, España  | |
| Inauguración | 1923 | |
| Capacidade | 15 000 | |
| ||
Historia
editarO Iberia Sport Club foi fundado en 1917 como un equipo popular, onde algúns dos seus xogadores eran obreiros da fábrica ferroviaria Carde y Escoriaza, de gran tradición na cidade. Vestía camisa gualdinegra e pantalón negro, así eran coñecidos popularmente como os avispas. O 7 de outubro de 1923 inaugúrase o Campo de Torrero, de gran capacidade, construído no tradicional barrio de Torrero, nuns terreos próximos á Canle Imperial de Aragón.
En 1917 o Iberia alcanza o título de Campión Rexional de Aragón, ao cal lle seguirían dez títulos máis durante o seguintes catorce anos.
Competiu durante tres tempadas na Segunda División de España, durante as tempadas 1928/29, 1929/30 e 1930/31. Durante a primeira tempada na categoría de prata (tempada 1928/29) estivo a piques de ascender, quedando empatado a puntos co campión o Sevilla Club de Fútbol que xogaría a promoción. Á seguinte tempada quedaría a un punto do ascenso directo, por detrás do Sporting de Gijón empatado a puntos, e a un do primeiro da categoría: o Deportivo Alavés, que ascendería a Primeira División. Pecharía a súa aventura en busca da elite ocupando o último posto, pasando a competir na Terceira División de España durante a tempada 1931/32, quedando quinto do Grupo III-A.
En marzo de 1932 fusionouse co segundo equipo da cidade, o Zaragoza Club Deportivo para formar o Zaragoza Foot-ball Club, actual Real Zaragoza.
Datos do club
editar- Tempadas en 1ª: 0
- Tempadas en 2ª: 3
- Tempadas en 3ª: 1
- Mellor posto na liga: 2º (Segunda División, tempada 1928-29)
Palmarés
editar- Subcampión da Segunda División (1): 1928-29.
- Campionato Rexional de Aragón (11): 1917, 1918, 1919, 1920, 1921, 1923, 1926, 1927, 1928, 1929, 1930, 1931.