Godella

Godella é un concello da Comunidade Valenciana, pertencente á provincia de Valencia, situado na zona noroeste da área metropolitana de Valencia, na comarca da Horta Nord. Ten 12.835 habitantes (2008).

Godella

Brasón
Localización
39°31′06″N 0°24′37″O
Estado	España
Comunidade autónoma	Comunidade Valenciana
Provincia	provincia de Valencia
Comarca da Comunidade Valenciana	Horta Nord
Capital	Godella
Poboación
Poboación	13.414 (2023) (1.616,14 hab./km²)
Lingua oficial	Valenciano (lingua predominante)
Xeografía
Superficie	8,3 km²
Altitude	30 m
Comparte fronteira con	Bétera Rocafort Paterna Burjassot Valencia
Organización política
• Alcaldesa	Eva Sanchis i Bargues
Identificador descritivo
Código postal	46110
Código INE	46135
Código ARGOS de concellos	46135
Sitio web	godella.es

Xeografía

Godella está situado na Horta de Valencia, ao noroeste da capital. O termo municipal de Godella limita coas localidades de Bétera, Burjassot, Paterna, Rocafort e Valencia, todas elas da provincia de Valencia. O terreo participa da chaira da horta e dos outeiros calcáreas que se elevan cara ao interior, até alcanzar unha altura superior aos 120 m en Las Colonias e Camarena, no extremo noroeste do termo. O relevo accidentado vén constituído polo último esporón do suave anticlinal calcario que separa as concas do río Turia e do barranco do Carraixet.

A parte baixa da horta está formada por sedimentos cuaternarios. O barranco dos Frades é o accidente de maior importancia. Pódese acceder a esta localidade a través da liña 1 de MetroValencia.

Historia

Dos primeiros tempos da Idade dos Metais proceden os restos máis antigos atopados até agora no termo de Godella. Proceden da Covatella e forman un nivel inferior, posiblemente dun enterramento colectivo, sobre o que se atopa outro estrato da época romana. Os restantes vestixios arqueolóxicos son todos eles de época romana.

En tempos da reconquista cristiá era un casal árabe dos dous que aparecen co nome de Godayla no Llibre do Repartiment. Xaime I doouna a Pere Maça en 1238, mais tamén deu terras pertencentes a dito casal a Sancho Pérez de Novailes, a Pascual Castellet e a Pedro Azlor. Pasou logo a propiedade de Sancho Tena, e a principios do século XVI, a Bartolomeu Almenar. Pasou logo a mans da familia Juliá Muñoz, e finalmente aos baróns de Santa Bárbara.

A expulsión dos mouriscos, en 1609, deixou case sen habitantes a Godella, pero foi repoboada antes que outros lugares, dada a súa proximidade á cidade de Valencia. Aínda que isto é o que afirma a historiografía tradicional, non hai documentos escritos que o sustenten. Antes ao contrario, os documentos escritos demostran que Godella era un lugar habitado por "cristiáns vellos", sen mouriscos polo menos dende finais do século XV. Se houbo despoboamento en Godella durante os inicios do século XVII debeuse a que o señor xurisdicional do lugar, Cristóbal Muñoz, levou vasalos "seus" de Godella para repoboar outros lugares.

Demografía

Casa do Concello de Godella.

A principal característica de Godella son as diversas urbanizacións existentes no seu termo municipal que fixeron que se produza unha forte corrente de inmigración de clase media-alta dende outros municipios da comarca. Conta cunha poboación de 12.835 habitantes en 2008.

Evolución demográfica

1900	1910	1920	1930	1940	1950	1960	1970	1981	1991	2000	2005	2007
2.200	2.697	2.861	3.345	4.574	4.702	5.117	5.702	7.804	9.621	11.222	12.581	12.993

Economía

Aínda que unha parte do seu termo municipal cultivouse (prodúcense diversos produtos como patacas, cebolas ou chufas), a agricultura non ten apenas importancia na economía local. Tamén atopamos o polígono industrial de "Obradors", onde un edificio a resaltar é a nave-taller de Andreu Alfaro, eminente escultor valenciano.

Véxase tamén

Ligazóns externas

• Sitio web oficial