Wikipedia

Fernando Vidal

empresario e dirixente galego

Fernando Vidal Raposo, nado na Coruña o 20 de agosto de 1962, é un ex-deportista, empresario e dirixente deportivo galego.

Infotaula de personaFernando Vidal
Biografía
Nacemento20 de agosto de 1962 Editar o valor em Wikidata (61 anos)
A Coruña, España Editar o valor em Wikidata
Datos persoais
País de nacionalidadeEspaña Editar o valor em Wikidata
Actividade
Ocupaciónempresario (pt) Traducir , dirixente deportivo , deportista Editar o valor em Wikidata
LinguaLingua castelá e lingua galega Editar o valor em Wikidata

Empresario dedicado á actividade portuaria, na súa xuventude foi xogador de balonmán e atleta, proclamándose en 12 ocasións campión galego de lanzamento de peso (catro en pista cuberta e oito ao aire libre). Tras a súa retirada continuou ligado ao deporte, sendo durante anos presidente do OAR A Coruña e durante algo máis dun ano entre 2020 e 2021, presidente do Deportivo da Coruña.

Traxectoria editar

Naceu no barrio coruñés das Atochas, sendo o menor de tres irmáns. Traballou durante anos no porto da Coruña e en 2001 converteuse no presidente de Maritime Global Service SL, unha empresa dedicada a prestar servizos á industria marítima e portuaria. Posteriormente pasou a ocupar tamén a presidencia da Asociación Española de Armadores e entrou no consello de administración de Ibaizabal Management Services.[1]

Traxectoria deportiva editar

Destacou no atletismo, formando parte durante unha década da sección de atletismo do Deportivo da Coruña, do que foi capitán ata a súa desaparición en 1988.[2] Proclamouse campión galego de lanzamento de peso doce veces, (catro delas en pista cuberta e oito ao aire libre, todas de xeito consecutivo) entre 1982 e 1989.[3][4]

Xogou tamén ao balonmán, pasando polo OAR A Coruña e o Xiria de Carballo, ata a súa retirada en 1994.[5][6]

Como dirixente deportivo editar

Anos despois volveu ao OAR como directivo e posteriormente converteuse no presidente do club. Durante a súa presidencia o equipo acadou os mellores resultados da súa historia e estivo a piques de ascender á liga ASOBAL.[7] En maio de 2007 deixou o cargo e foi nomeado presidente de honra do club.[8][9]

En xaneiro de 2014 entrou a formar parte do novo consello de administración do Deportivo da Coruña, presidido por Tino Fernández. Despois de case catro anos, presentou a súa dimisión en outubro de 2017, por diferenzas co resto do consello.[10]

En 2020 presentou a súa candidatura á presidencia do Deportivo, saíndo elixido co apoio de máis do 99% das accións representadas na Xunta de Accionistas.[11] Chegou á presidencia nun momento crítico para o club, ocupando a derradeira posición da Segunda División tras 22 xornadas. Entre as súas primeiras medidas, antes incluso de tomar posesión, estivo a contratación de Fernando Vázquez como novo adestrador.[12] Tamén chegou a un acordo con Abanca, para que dita entidade se convertese no máximo accionista do Deportivo, asumindo deste xeito a débeda que o club tiña co banco. A medida foi aprobada polos socios en xullo de 2020.[13]

No plano deportivo, o equipo tivo unha melloría inicial con Vázquez, chegando a encadear sete vitorias consecutivas, pero un mal final de tempada acabou por provocar na derradeira xornada o descenso do club á Segunda B catro décadas despois.[14] Con todo, Vidal renovou a Vázquez por outra tempada, mais Abanca acabou por pedir o despedimento do adestrador tras a xornada 8, na que o equipo perdeu contra o Celta B, a pesar de que os coruñeses ocupaban a segunda praza. Vidal defendeu o adestrador e mantívoo unha xornada máis, pero o equipo volveu caer derrotado, sendo cesado entón Fernando Vázquez e contratado como substituto Rubén de la Barrera.[15] O técnico coruñés só puido conseguir un punto nas seguintes tres xornadas, caendo varias posicións na táboa. Nese momento e a petición de Abanca, Fernando Vidal xunto ao resto do consello de administración, presentaron a súa dimisión.[16] Foi substituído por Antonio Couceiro.[17]

Vida persoal editar

Casou en 1993 con María Otero, neta do histórico futbolista Luis Otero, coa que tivo dous fillos.[1]

Notas editar

  1. ↑ 1,0 1,1 Centeno, Alexandre (14 de xaneiro de 2020). "Fernando Vidal, el lanzador que se forjó a sí mismo". La Voz de Galicia (en castelán). Consultado o 8 de febreiro de 2021. 
  2. ↑ "Fernando Vidal, novo presidente do RC Deportivo". 14 de xaneiro de 2020. Consultado o 8 de febreiro de 2021. 
  3. ↑ "Campións galegos de atletismo en pista cuberta" (PDF). Federación Galega de Atletismo. Consultado o 21 de febreiro de 2021. 
  4. ↑ "Campións galegos de atletismo ao aire libre" (PDF). Federación Galega de Atletismo. Consultado o 21 de febreiro de 2021. 
  5. ↑ Miranda, Carlos (14 de xaneiro de 2020). "Fernando Vidal, la mano derecha a la que ya apuntan los focos". La Opinión A Coruña (en castelán). Consultado o 8 de febreiro de 2021. 
  6. ↑ "«Con lo que le dan al básquet las instituciones, yo asciendo a la Asobal»". La Voz de Galicia (en castelán) (A Coruña ed.). 23 de marzo de 2004. p. 41. 
  7. ↑ "El OAR homenajeará a Fernando Vidal antes del encuentro de esta tarde". La Voz de Galicia (en castelán). 12 de maio de 2007. p. 38. 
  8. ↑ "El Oar regala a Fernando Vidal un triunfo frente al Cangas en su despedida como presidente". La Voz de Galicia (en castelán). 13 de maio de 2007. p. 50. 
  9. ↑ "El Presidente de Honor del O.A.R. CORUÑA, D. Fernando Vidal y el exdirectivo D. Tino Fernández trabajarán por el futuro del R.C. Deportivo de La Coruña" (en castelán). 22 de xaneiro d e2014. Consultado o 8 de febreiro de 2021. 
  10. ↑ "Fernando Vidal dimite por diferencias con el consejo de administración del Deportivo". La Voz de Galicia (en castelán). 4 de outubro de 2017. Consultado o 8 de febreiro de 2021. 
  11. ↑ "Apoyo mayoritario a Fernando Vidal, nuevo presidente del Deportivo" (en castelán). 14 de xaneiro de 2020. Consultado o 8 de febreiro de 2021. 
  12. ↑ "Fernando Vázquez, nuevo entrenador del Deportivo" (en castelán). 29 de decembro de 2019. Consultado o 8 de febreiro de 2021. 
  13. ↑ "Amplio respaldo a que Abanca pase a ser el accionista principal del Dépor" (en castelán). 29 de xullo de 2020. Consultado o 8 de febreiro de 2021. 
  14. ↑ Pena, Héctor (20 de xullo de 2020). "O Deportivo descende a Segunda B e o Lugo salva a categoría". Nós Diario. Consultado o 11 de xaneiro de 2021. 
  15. ↑ "Fernando Vidal, Rodríguez Cebrián, Lendoiro, Abanca… Historia de un desencuentro" (en castelán). 8 de febreiro de 2021. Consultado o 8 de febreiro de 2021. 
  16. ↑ "Fernando Vidal y el Consejo del Deportivo presentan su dimisión" (en castelán). 8 de febreiro de 2021. Consultado o 8 de febreiro de 2021. 
  17. ↑ "Antonio Couceiro, novo presidente do Real Club Deportivo após dimitir o anterior Consello de Administración". 8 de febreiro de 2021. Consultado o 8 de febreiro de 2021. 


Predecesor:
Paco Zas 		 Presidente do Deportivo da Coruña 
2020–2021 		Sucesor:
Antonio Couceiro Méndez
Traído desde «https://gl.wikipedia.org/w/index.php?title=Fernando_Vidal&oldid=6050421»