Estadio Anxo Carro

O estadio Anxo Carro é un estadio de fútbol situado na cidade de Lugo. Inaugurado o 31 de agosto de 1974, serve de campo local ao Club Deportivo Lugo e pode albergar preto de 8000 espectadores.

Anxo Carro
Tipo	estadio de fútbol
Localización
43°00′12″N 7°34′15″O
Estado	España
Comunidade autónoma	Galicia
Provincia	provincia de Lugo
Concello	Lugo
Localización	Avenida dos Deportes s/n - 27004 Lugo, Galicia
Datas
Fundación	1974
Inauguración	31 de agosto de 1974
Acontecementos
Dimensións
Capacidade	7.840
Tipo superficie	céspede
Persoas e organizacións
Propietario/a	Xunta de Galicia
Arquitecto/a	José Arias Santiago Catalán Eduardo Herráez
Ocupante	CD Lugo
Deporte
Deporte	fútbol
Localía	CD Lugo
[ Wikidata ]

Historia

O Anxo Carro está situado á beira do río Miño. Cabo do propio estadio encóntranse o Campo Municipal da Cheda e o complexo deportivo O Palomar, que inclúe un pavillón cuberto e tres canchas de tenis. Houbo un terceiro campo, o Emilio Núñez Torrón, no lugar que hoxe ocupa o aparcadoiro principal. Nos arredores tamén está o Pazo de Feiras e Congresos de Lugo. O estadio recibe o nome de Ángel Carro Crespo, benfeitor do deporte en Lugo e responsable da construción do campo vello amais de presidente do Círculo das Artes en 1934.

Foi inaugurado durante a segunda etapa do Lugo en Terceira División, con capacidade para 7.000 espectadores. A data de apertura deste estadio, que substituía ao antigo Anxo Carro (ou "campo de los Miñones") situado na zona da Praza de Viana do Castelo, foi o 31 de agosto de 1974. Para a súa inauguración disputouse un torneo triangular no que participaron, xunto ao Lugo, o Club Lemos e o Deportivo da Coruña. O CD Lugo venceu aos de Monforte na quenda de penaltis e perdeu a final cos herculinos por 1-0.

No ano 2001 o estadio foi remodelado e modernizado, xa que se atopaba nun estado de semi-ruína e desmellorado por sucesivas obras sen moita planificación. O proxecto de mellora foi deseñado polos arquitectos José Arias, Santiago Catalán e Eduardo Herráez. As obras incluíron unha remodelación das tres bancadas existentes, que pasaron a contar con cadeiras para tódolos seareiros, a reforma da planta baixa e a creación de novas fachadas. Co novo aspecto o estadio gañaba en calidade das súas instalacións, superiores á media da categoría na que militaba o equipo no momento (Segunda B), mais perdía en capacidade, que descendeu a 4.800 espectadores. O 3 de xaneiro de 2007 disputouse a final da Copa Xunta de Galicia 2006, que enfrontou o CD Lugo co Celta de Vigo (2-3). O 5 de setembro de 2011 o estadio acolleu o encontro entre a selección de fútbol sub-21 de España e a de Xeorxia, clasificatorio para a Eurocopa sub-21 de 2013 (2-0).

En 2013, tralo ascenso á Segunda División do Lugo, foi colocada o 8 de xuño unha bancada supletoria con capacidade para 2.292 espectadores no fondo para recibir á Ponferradina, que ficaría finalmente de forma permanente. No verán dese mesmo ano, o estadio foi reformado para cubir a maioría do asentos e aumentar a bancada de tribuna, recuperando xunto coa mencionada bancada supletoria unha capacidade próxima aos 8.000 espectadores. O primeiro cheo do estadio tralas obras de ampliación rexistrouse o 3 de maio do ano seguinte co partido entre o CD Lugo e o Deportivo da Coruña (2-2).

Véxase tamén

Outros artigos

• Club Deportivo Lugo