Torre de Marce
A Torre de Marce é unha fortificación medieval situada no lugar de Marce na parroquia de Vilar de Ortelle no concello lugués de Pantón, situado na Comarca de Terra de Lemos.
| Torre de Marce | |
|---|---|
 | |
| Concello | Pantón |
| Provincia | Lugo |
| Comunidade autónoma | Galicia |
| Coordenadas | 42°31′7.2″N 7°42′10.45″O / 42.518667, -7.7029028Coordenadas: 42°31′7.2″N 7°42′10.45″O / 42.518667, -7.7029028 |
| Estilo arquitectónico | |
| Estilo orixinal | ? (século IX) |
| Estilo actual | ? (século XV) |
| Estado actual | En ruínas. Visitable |
| Véxase tamén | |
| Castelos de Galicia | |
| [ editar datos en Wikidata ] | |
Historia editar
Os veciños de Marce recordan que era parte dun castelo, o Castelo de Marce, tan alto que polas mañás a súa sombra chegaba alén do río Miño e facía sombra á igrexa de Chouzán. Tamén recordan que xunto coa aldea pertencía ao Conde de Lemos e que era de moita importancia por atoparse nunha zona de alto valor estratéxico para a comarca.
Aparece por primeira vez en fontes escritas no ano 841, na que hai mención da existencia dun castelo, novamente mencionado en 1158 pero co nome de Castelo do Miño.
O nome de Castelo de Marce aparece na escritura na que o rei Fernando II confirma, en 1164, as doazóns que fixeran os seus proxenitores á igrexa de Lugo, ó precisar os lindeiros do couto de Atán.
No ano 1480 era dono Lopo Alfonso de Marceo, que calzaba esporas de ouro, vestía de veludo e adornábase con colares de ouro. Propietario de tres lugares: Monforte, Roucos e Sarria.
Segundo Castellá Ferrer na súa obra de 1610 Historia del Glorioso Apóstol Santiago, pertenceu a Lope Alonso López e ó seu fillo Alonso López que mantiveron enfrontamentos e rivalidades con don Pedro Garza de Castillón e co duque de Arjona don Fadrique de Castro. Comenta Castellá que viu o castelo, o cal constaba dunha torre, un palacio desmantelado, un foso e proteccións de terra.
Descrición editar
Os restos da antiga fortificación sitúanse no extremo sueste do lugar de Marce, sobre un terreo de pronunciada pendente.
O que se conserva da torre atópase entre construcións máis recentes. Trátase dunha construción de planta cadrada de 7,5 metros de lado e 7 metros de altura na súa parte máis alta e 4 metros na súa parte máis baixa. Cuberta por un tellado a unha soa auga.
Divídese en dúas plantas separadas por un pavimento de madeira. E a planta máis baixa atópase baixo o terreo. Está construída con pedra de granito moi basta e as súas paredes teñen 120 centímetros de espesor.
Na actualidade tres dos seus lados están rodeados por construcións modernas de pedra.
Véxase tamén editar
Bibliografía editar
- Isacc Rielo Carballo. Pantón Historía e Fidalguía. Pantón Historía e Fidalguía = 2000 (Editorial Compostela S.A.). ISBN 84-8064-095-2.
- Asociación Xuvenil Os Estraloxos (2001). Lendas e tradicións da Ribeira Sacra : Vilar de Ortelle, Pantón. Pantón: Deputación Provincial de Lugo. ISBN 84-8064-108-8.
- Ramón Castro López. Reseña histórico descriptiva de la parroquia de Vilar de Ortelle y su comarca. Pantón: Diputación Provincial de Lugo, 1929. ISBN 84-8192-174-2.
Outros artigos editar
Ligazóns externas editar
- Julio Fernández Pintos, ed. (22/03/2001). "La Torre de Marce (Vilar de Ortelle, Pantón)". La Torre de Marce (en castelán). Arquivado dende o orixinal o 14/07/2005. Consultado o 18/10/2008.
- La Voz de Galicia, ed. (26/02/2008). "Torres sobre a ribeira en Marce". Torres sobre a ribeira en Marce. Consultado o 18/10/2008.