Servizo de Protección da Natureza da Garda Civil
O Servizo de Protección da Natureza (SEPRONA) é unha unidade da Garda Civil en España, encargada da conservación da natureza e os recursos hidráulicos, así como da riqueza cinexética, piscícola, forestal e de calquera outro mester relacionado coa natureza, segundo o artigo 12 da Lei Orgánica 2/1986, de 13 de marzo, de Forzas e Corpos de Seguridade.[1]
Creado no ano 1988 e reorganizado no ano 2000, o SEPRONA ten a misión de evitar agresións ó medio ambiente, e a de protexer os bens mobles e inmobles catalogados como Bens do Patrimonio Histórico en todo o territorio español e no seu mar territorial, incluída a preservación de especies protexidas e ameazadas. A súa base de traballo é moi extensa, debendo os seus compoñentes traballar con máis de 2000 leis e decretos, sendo a especialidade da Garda Civil que maior lexislación manexa.
Trátase da única policía xudicial verde de Europa, e o seu labor é recoñecido por moitas ONG.
Referencias históricas editar
Dende a creación do corpo, establecéronse as regras necesarias para a organización militar e os seus servizos como institución civil. Esas regras foron reunidas nun pequeno caderno, aprobado por Real Orde o 20 de decembro de 1845, cuxo título, "Cartilla do Garda Civil", foi redactado pola Inspección Xeral do Corpo, sendo a primeira referencia histórica nacional e internacional que se ten dunha policía en canto á protección e conservación do medio ambiente.
Cometidos editar
- Colaborar coas autoridades e organismos correspondentes para planear e executar unha política eficaz nesta materia.
- Fomentar condutas de respecto á natureza.
- Comprobar o estado de conservación dos recursos hidráulicos (continentais e marítimos), xeolóxicos e forestais para impedir calquera tipo de contaminación, agresión ou aproveitamento abusivo.
- Colaborar na prevención de incendios forestais.
- Protexer o medio ambiente atmosférico, vixiando o seu grao de contaminación e nivel de radioactividade.
- Realizar accións tendentes a favorecer o normal desenvolvemento de flora e fauna (continentais e marítimas), especialmente das especies protexidas.
- Contribuír ó correcto aproveitamento dos recursos forestais, cinexéticos e piscícolas.
- Facilitar o adecuado gozo do espazo natural, impedindo actividades que poidan degradalo.
- Crear as bases de datos relativas ó Servizo.
Organización editar
A Xefatura do Servizo de Protección á Natureza está composto de:
- Mando: un xeneral da Garda Civil.[2]
- Secretaría: Plana Maior.
As unidades operativas do Servizo de Protección da Natureza divídense en:
- Patrullas: chamadas inicialmente patrullas motorizadas todo terreo, son as unidades básicas de vixilancia e protección dun territorio.
- Equipos: Son unidades encargadas da detección, cuantificación e investigación das agresións graves ó medio.
- Destacamentos: Son unidades creadas expresamente para a vixilancia e protección de espazos legalmente protexidos.
Estatística editar
Este artigo (ou sección) está desactualizado(a). A información fornecida mudou ou é insuficiente. |
Estatística extraída do Ministerio do Interior correspondente ó ano 2007:
| INTERVENCIÓNS | CLASE |
|---|---|
| 4.029 | Delitos |
| 350 | Faltas penais |
| 138.706 | Infraccións administrativas |
| 23.626 | Informes |
| 474 | Detidos |
| 1.164 | Imputados |
Notas editar
- ↑ BOE do 14 de marzo de 1986 (en castelán).
- ↑ "Fundación-Biodiversidad.es" (en castelán). Arquivado dende o orixinal o 13 de decembro de 2009. Consultado o 05 de decembro de 2009.
Véxase tamén editar
| Wikimedia Commons ten máis contidos multimedia na categoría: Servizo de Protección da Natureza da Garda Civil |
- Agrupación de Tráfico da Garda Civil.
- Servizo de Montaña da Garda Civil.
- Servizo Marítimo da Garda Civil.
- Unidade Especial de Intervención da Garda Civil.
Ligazóns externas editar
- Páxina web do Seprona Arquivado 20 de abril de 2016 en Wayback Machine.