Ramón Barreiro
Ramón Barreiro Vázquez, nado en Castronuño (Valladolid) o 28 de agosto de 1906[Cómpre referencia] e finado en Madrid o 1 de maio de 1981,[1] foi un fotógrafo, cineasta e escritor galego.
| Biografía | |
|---|---|
| Nacemento | 28 de agosto de 1906  Castronuño, España |
| Morte | 1 de maio de 1981 (74 anos) Madrid, España |
| Datos persoais | |
| País de nacionalidade | España |
| Actividade | |
| Ocupación | director de cinema , guionista |
| Lingua | Lingua castelá |
| Familia | |
| Irmáns | Enrique Barreiro |
 | |
Traxectoria editar
Barreiro era fillo do fotógrafo estratense Ramón Barreiro Barcala, primeiro establecido en México e despois en Pontevedra. En 1925 comezou a colaborar co seu irmán Enrique coa rodaxe de filmes e coas súas investigacións co cinema en cor, como o documental Pontevedra, cuna de Colón, estreado no Teatro Principal de Pontevedra en 1927.
En 1932 montou con Enrique e o pintor Ramón Peña a produtora Folk, coa que rodaron noticieiros e filmes como Por unha Galicia nova, en apoio do estatuto de autonomía. As dificultades financeiras e as desavinzas co irmán levárono a trasladarse a Madrid en 1935 para dedicarse á publicidade. En 1936 foi contratado pola empresa CEA para realizar os documentais Jerez, El monasterio de piedra e Velázquez. Durante a guerra civil traballou para o bando republicano e realizou a curtametraxe Madrid heroico para o SUICEP (Sindicato Único de la Industria Cinematográfica y Espectáculos Públicos), dependente da CNT
Ao remate da guerra retornou a Pontevedra en abril de 1939,[2] e lavou a súa reputación co libro Metralla blanca del Madrid rojo (1939). Iniciou unha carreira literaria, escribiu unha obra teatral para nenos e publicou o libro Nosotros los hombres (1943); tamén colaborou no diario Informaciones. Na década de 1940 dirixiu varias películas documentais como a serie Retablo español. En 1944 dirixiu a súa primeira longametraxe, El sobrino de don Búfalo Bill, primeiro dos seus filmes de humor e parodia.
Realizou programas en Televisión Española como Club mediodía e Teleclub, volvendo ao cinema esporadicamente, como ao traballar como coguionista do filme de León Klimovsky Torrejón City (1962).
Filmografía editar
- El sobrino de don Búfalo Bill, 1944.
- El otro Fu-Man-Chú, 1946.
- El pirata Bocanegra, 1946-49.
- Póker de Ases, 1947.
- Pototo, Boliche y compañía, 1948.
Obra literaria editar
- Metralla blanca del Madrid rojo, 1939.
- Nosotros los hombres, 1943.
- El nuevo pecado de Adán y Eva, 1965.
Notas editar
- ↑ Necrolóxica en ABC, 5-5-1981, p. 108.
- ↑ El Pueblo Gallego, 19-4-1939, p. 2.
Véxase tamén editar
Bibliografía editar
- "Barreiro Vázquez, Ramón". Dicionario biográfico de Galicia 1. Ir Indo Edicións. 2010-2011. p. 97.
- "Barreiro Vázquez, Ramón". Enciclopedia Galega Universal. Ir Indo. 1999-2002. ISBN 84-7680-288-9.
- "Barreiro Vázquez, Ramón". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8.
- Castro de Paz, José Luis; Fandiño, Xaime (2010). Ramón Barreiro. Humor, parodia e modernidade. A Coruña: CGAI.
- Cabo Villaverde, José Luis; et al., eds. (2001). Diccionario do cine en Galicia (1896-2000). Xunta de Galicia. pp. 47–49. ISBN 84-453-3152-3.
- Couceiro Freijomil, Antonio (1951-53). Diccionario bio-bibliográfico de escritores (en castelán) I. Bibliófilos Gallegos. p. 128.