Pepe Villar
José "Pepe" Villar Fernández, nado en Vigo o 20 de agosto de 1928 e finado o 27 de xuño de 2007, foi un futbolista e adestrador de fútbol galego. Estivo vinculado case en exclusiva ao Celta de Vigo.
| Pepe Villar | |||
|---|---|---|---|
| Información persoal | |||
| Nome | José Villar Fernández | ||
| Nacemento | 20 de agosto de 1928 | ||
| Lugar de nacemento | Vigo | ||
| Falecemento | 27 de xuño de 2007 | ||
| Posición | Defensa | ||
| Carreira sénior | |||
| Anos | Equipos | Aprs | (Gls) |
| 1949–1950 | Arousa | 25 | (0) |
| 1950–1961 | Celta de Vigo | 239 | (8) |
| Adestrador | |||
| 1967 | Celta de Vigo | ||
| 1970 | Celta de Vigo | ||
| 1975 | Celta de Vigo | ||
| 1977 | Celta de Vigo | ||
| 1986 | Celta de Vigo | ||
| 1988 | Celta de Vigo | ||
|
Partidos e goles só en liga doméstica. [ editar datos en Wikidata ] | |||
Traxectoria editar
Comezou a súa carreira deportiva como defensa no equipo do barrio vigués de Coia. No verán de 1948 foi fichado polo Celta de Vigo, que o cedeu na tempada 1949/50 ao Arousa, disputando así a histórica única tempada do club na Segunda División. A continuación volveu ao Celta, do que xa non se desvincularía durante as seguintes catro décadas. Debutou en Primeira División o 10 de setembro de 1950 ante a UE Lleida. Durante a tempada 1950–51, na que o Celta quedou de 8º, xogou 3 encontros. Na tempada seguinte xogou 22 partidos e meteu un gol, rematando o Celta en novena posición. Nas seis campañas seguintes, todas elas en primeira división, xogou 165 partidos e marcou 6 goles. Porén, durante a tempada 1958–59 o xogador vigués foi atropelado por unha moto. O equipo notou a súa baixa, rematando a tempada como pechacancelas.
Os dous últimos anos da súa carreira como xogador (1959–60 e 1960–61) discorreron na Segunda División, clasificándose os dous anos para a promoción de ascenso pero sen acadar o obxectivo. Logo da última campaña, na que só xogou tres partidos, decidiu retirarse. En total xogou 269 partidos co club celeste: 207 en primeira división (onde marcou 7 goles), 32 en segunda, 9 de promoción de ascenso e 21 de Copa.
Trala súa retirada como xogador mantívose ligado ao club como auxiliar do adestrador Louis Hon e dirixindo o equipo xuvenil durante moito tempo, levándoos en 1965 á final do campionato de España fronte ao Athletic Club de Bilbao. Na tempada 1966–67 o primeiro equipo do Celta xogaba en Segunda División, e trala dimisión do adestrador César Rodríguez, Pepe Villar dirixiu o combinado no treito final da liga. Posteriormente exerceu como segundo adestrador de Ignacio Eizaguirre e un tándem co gran capitán, Manolo, a finais da tempada 1987–88.
Véxase tamén editar
Ligazóns externas editar
- Datos do xogador en bdfutbol.com (en castelán)
- Datos do adestrador en bdfutbol.com (en castelán)
- Ficha en Todo Celta (en castelán).
- Ficha en Yo jugué en el Celta (en castelán).