Miquel Iceta
Miquel Iceta i Llorens, nado en Barcelona o 17 de agosto de 1960, é un político catalán, primeiro secretario do Partit dels Socialistes de Catalunya (PSC) dende o ano 2014[1]. Dende xaneiro a xullo de 2021 foi ministro de Política Territorial do Goberno de España, en substitución de Carolina Darias, que foi nomenada Ministra de Sanidade, en substitución de Salvador Illa, que deixou o cargo para concorrer como candidato do PSC nas eleccións ao Parlamento de Cataluña de 2021.[2] Dende xullo de 2021 ata novembro de 2023 foi ministro de Cultura e Deporte.[3]
.jpg)
Iceta foi secretario primeiro do Parlamento de Cataluña dende 2012 até 2014 e candidato a Presidente da Generalitat de Cataluña polo PSC nas eleccións de 2015 e de 2017.
Traxectoria editar
Iceta comezou a súa actividade política como afiliado do Partit Socialista Popular (PSP) de Cataluña con 17 anos, pasando en 1978 a formar parte do Partit dels Socialistes de Catalunya (PSC), entrando na súa dirección en 1984, realizando labores de organización, formación e de coordinación de campañas electorais.
Foi un dos primeiros políticos españois en declarar abertamente a súa condición de homosexual.[4]
Foi concelleiro de Cornellà de Llobregat entre 1987 e 1991, director do departamento de análise do gabinete da Presidencia do Goberno español (1991-1995), subdirector do devandito gabinete (1995-1996). Nas Eleccións xerais de 1996 resultou elixido deputado por Barcelona na candidatura do PSC-PSOE.
No 1999 presentouse nas listas ao Parlamento de Cataluña, revalidando a súa acta nas eleccións de 2003, 2006, 2010 e 2012. Na VII lexislatura foi relator na redacción do Estatuto de Autonomía de Cataluña de 2006. Foi voceiro do Grupo Parlamentario Socialista de 2003 a 2012. Na constitución da X lexislatura, o 17 de decembro de 2012, asumiu o posto de secretario primeiro da Mesa do Parlamento.
Dentro do Partit dels Socialistes de Catalunya foi viceprimeiro secretario (2000-2011). No ano 2011 optou á primeira secretaría,[5] aínda que finalmente retirou a súa candidatura por falta de apoios.[6] Trala renuncia de Pere Navarro como primeiro secretario do PSC en 2014, Iceta foi o único candidato que se presentou para substituílo nas primarias.
Foi candidato do PSC en 2015 para a presidencia da Generalitat de Cataluña nas que o seu partido acadou 16 escanos.
En 2016 foi reelixido líder do PSC, gañando nas primarias a Núria Parlón. Repetiu como aspirante do PSC á presidencia da Generalitat no contexto das eleccións autonómicas de 2017.
Notas editar
- ↑ Partit dels Socialistes de Catalunya, ed. (13 de xullo de 2014). "“Els socialistes han dit avui que es volen posar en marxa, posar-se dempeus”". Arquivado dende o orixinal o 24 de setembro de 2015. Consultado o 14 de xullo de 2014.
- ↑ Regió7 (ed.). "Miquel Iceta és el nou ministre de Política Territorial i Carolina Darias de Sanitat" (en catalán). Consultado o 26 de xaneiro de 2021.
- ↑ "BOE-A-2021-11538 Real Decreto 532/2021, de 10 de julio, por el que se nombra Ministro de Cultura y Deporte a don Miquel Octavi Iceta i Llorens.". www.boe.es. Consultado o 2023-11-27.
- ↑ "Si, también hay diputados gays". Miquel Iceta
- ↑ Iceta fa públic un decàleg per liderar el PSC
- ↑ «Iceta es retira de la cursa de primer secretari del PSC per manca de suports».
Véxase tamén editar
Wikimedia Commons ten máis contidos multimedia na categoría: Miquel Iceta  |
Ligazóns externas editar
- Páxina oficial (en castelán) e (en catalán)