Miguel Bastón
Miguel González Bastón, coñecido simplemente como Bastón, nado en Marín o 29 de xuño de 1961, é un exfutbolista galego que xogaba de porteiro. Histórico capitán do Real Burgos, defendeu a súa portería durante unha década en catro categorías diferentes, sendo unha peza destacada en todos os ascensos dende a Terceira ata a Primeira División.
| Bastón | |||
|---|---|---|---|
 | |||
| Información persoal | |||
| Nome | Miguel González Bastón | ||
| Nacemento | 29 de xuño de 1961 (62 anos) | ||
| Lugar de nacemento | Marín | ||
| Posición | Porteiro | ||
| Carreira xuvenil | |||
| –1978 | Marín | ||
| 1978–1981 | Atlético de Madrid | ||
| Carreira sénior | |||
| Anos | Equipos | Aprs | (Gls) |
| 1980–1984 | Atlético Madrileño | 11 | (0) |
| 1982–1983 | Atlético de Madrid C | 30 | (0) |
| 1984–1994 | Burgos | 241 | (0) |
| 1994–1995 | Chaves | 19 | (0) |
| 1996 | Ikast FS | ||
|
Partidos e goles só en liga doméstica. [ editar datos en Wikidata ] | |||
É pai do tamén futbolista Borja Bastón.
Traxectoria editar
Comezos (1961-1984) editar
Fillo dun rianxeiro de Taragoña, naceu en Marín o 29 de xuño de 1961.[1] Formouse como futbolista no Marín CF da súa vila natal, fichando aos 17 anos polo Atlético de Madrid.[2][3][4] Xogou no equipo xuvenil do equipo madrileño e pasou polos dous filiais do club, en Terceira División e en Segunda B, pero sen chegar a debutar co primeiro equipo.[5]
Unha década no Burgos (1984-1994) editar
En 1984 fichou polo Real Burgos, da Terceira División. Foi titular nos 38 partidos da tempada e acabou como campión do seu grupo e como o gardameta menos goleado de todas as categorías do fútbol nacional, con só 13 goles encaixados.[6] O equipo burgalés, adestrado por García Verdugo, disputou a fase de ascenso a Segunda B, desfacéndose na primeira eliminatoria do San Martín asturiano. Na segunda e definitiva eliminatoria, o rival foi o Huesca, ao que o Burgos derrotou pola mínima no partido de ida no Plantío. No partido de volta, disputado nun ateigado Alcoraz, Bastón conseguiu manter a portería a cero, detendo os numerosos disparos do Huesca, e mantendo a concentración a pesar dos petardos e as pedras que lle lanzaron algúns afeccionados oscenses. A súa actuación foi determinante para que o club lograse aquel histórico ascenso, e o gardameta foi alcumado "o heroe de Huesca".[6][7]
Só dous anos despois, o club conseguiu o ascenso á Segunda División, sendo Bastón de novo o gardameta menos goleado da categoría, con só 20 goles encaixados en 42 partidos. Continuou coa titularidade na portería burgalesa durante as seguintes tres tempadas en Segunda, e na terceira delas (1989/90), co galego Naya no banco, o club proclamouse campión da categoría e logrou un histórico ascenso á Primeira División. O capitán Bastón recibiu o Trofeo Zamora como o porteiro menos goleado, despois de ter recibido 24 goles en 38 partidos.[1]
Debutou en Primeira ao mesmo tempo que o club, na primeira xornada da tempada 1990/91 contra o Cádiz no Plantío, partido que rematou con vitoria burgalesa tras un solitario gol do iugoslavo Barbarić. Porén, Bastón xogou só 10 partidos de liga na máxima categoría en tres anos, tras facerse coa titularidade Agustín Elduayen. Recuperou a regularidade na portería na primeira metade da tempada 1993/94, na que disputou 18 partidos, co equipo de novo en Segunda. O club burgalés, afogado economicamente, acabou descendendo ese ano á Segunda B, e foi excluído das competicións para a seguinte campaña.
Portugal e Dinamarca (1994-1996) editar
Bastón fichou entón polo Chaves, da Primeira Liga portuguesa, co que disputou 19 partidos durante a campaña 1994/95. En marzo de 1996 asinou un contrato dun mes co Ikast FS, derradeiro clasificado da Superliga de Dinamarca, para substituír o lesionado Jan Rindom.[8]
Trala retirada (1996-actualidade) editar
Pouco despois de colgar as luvas regresou ao Atlético de Madrid para exercer como adestrador de porteiros. No club madrileño xogou o seu fillo Borja, que comezou tamén como gardameta, pasando logo a posicións ofensivas.[4]
Palmarés editar
Real Burgos
- Segunda División (1): 1989/90.
- Terceira División (1): 1984/85.
Individual
Notas editar
- ↑ 1,0 1,1 Barreiros, Pedro (3 de setembro de 2013). "Bastón vuelve a Riazor". La Voz de Galicia (en castelán). Consultado o 8 de decembro de 2021.
- ↑ "El "match" de la jornada". El Pueblo Gallego (en castelán) (20651). 6 de xuño de 1979. p. 19. Consultado o 7 de decembro de 2021.
- ↑ García Carragal, Ángel (6 de novembro de 2017). "Marín, premios 'Facendo Historia'". Diario de Pontevedra (en castelán). Consultado o 7 de decembro de 2021.
- ↑ 4,0 4,1 "Lo que vive ahora lo peleó desde niño" (en castelán). 18 de febreiro de 2016. Consultado o 8 de decembro de 2021.
- ↑ "0-0: El Barcelona controló al At. Mad". Mundo Deportivo (en castelán). 8 de xuño de 1980. p. 12. Consultado o 7 de decembro de 2021.
- ↑ 6,0 6,1 Delgado Barriuso, Jesús Ignacio (21 de xuño de 2015). "Trigésimo aniversario del ascenso del Real Burgos a 2ª B" (en castelán). Consultado o 7 de decembro de 2021.
- ↑ "Reencuentro de los héroes del ascenso" (en castelán). 22 de setembro de 2015. Consultado o 7 de decembro de 2021.
- ↑ "Bastón ficha por el colista de la liga danesa". La Voz de Galicia (en castelán). 13 de marzo de 1996. p. 50.
Véxase tamén editar
Ligazóns externas editar
- Datos do xogador en BDFutbol (en castelán).