Mate

• Este artigo trata sobre a bebida, para a planta véxase o artigo herba mate.

O mate é unha infusión tradicional na metade sur de Suramérica (Arxentina, Uruguai, Brasil, Chile, Paraguai e Bolivia) feita con follas de herba mate. Ten un sabor amargo polos taninos das follas, polo cal algunha xente bótalle azucre, mel ou outros edulcorantes.

Presentación dun mate con calabaza e bombilla.

A herba mate posúe unha pequena cantidade de cafeína, o que fai que esta infusión poida ter un efecto estimulante nos consumidores. Non obstante, as marcas comerciais de mate adoitan engadirlle outras herbas co fin de reducir a acidez da infusión, e algunhas desas herbas teñen un efecto sedante que contrarresta o efecto estimulante da cafeína.

Esta bebida xa era consumida polos guaranís na época precolombiana, e foi adoptada polos colonizadores españois, pasando a formar parte axiña da identidade cultural das futuras sociedades da Arxentina, Uruguai e Paraguai.

Preparación

A infusión prepárase nun recipiente chamado mate ou calabaza, que se enche con tres cuartas partes de herba mate. A herba mate está secada, cortada e molida. Despois tápase coa man e ponse boca abaixo, axítase, e ponse de novo boca arriba con tino, de xeito que a superficie fique inclinada. Por unha beira a herba ten que chegar ata o bordo, e pola outra ten que estar mais baixa. Despois engádeselle un pouco de auga a uns 90 °C, agárdase a que a absorba, e despois ségueselle botando auga quente. O seguinte paso e introducir a bombilla pola parte oposta á que ten mais herba. A bombilla é unha palliña metálica coa que se suga a infusión. Esta ten que ser introducida tapando cun dedo o burato superior, para que as herbas non entren e bloqueen o seu interior.

• 
  Inclinar
• 
  Botar auga quente
• 
  Introducir bombilla

Véxase tamén

Outros artigos

• Herba mate

Ligazóns externas

Información sobre o mate (en castelán)