María Miramontes

María Dolores Miramontes Mato, nada en Guísamo (Bergondo) o 6 de abril de 1895 e finada en Buenos Aires en 1964, foi unha activista e intelectual rexionalista galega.

María Miramontes

Biografía
Nacemento	6 de abril de 1895 Guísamo, España
Morte	17 de setembro de 1964 (69 anos) Buenos Aires, Arxentina
Datos persoais
País de nacionalidade	España
Actividade
Ocupación	Intelectual , política
Lingua	Lingua castelá
Familia
Cónxuxe	Ánxel Casal

Traxectoria

María Miramontes, tecedora dun país. Documental de Nós TV

Filla de xornaleiros, trasladouse coa súa familia á Coruña, onde comeza a traballar nun obradoiro de costura aos 11 anos. Nesta cidade relaciónase con outras mulleres que terán un papel moi destacado no galeguismo e no republicanismo como Elvira Bao Maceiras e Amparo López Jeán.

Militou nas Irmandades da Fala e en 1918 formou parte da súa Xunta Directiva. En 1920 casou con Ánxel Casal, abriron xuntos unha tenda de tecidos, na que traballou de costureira. O matrimonio puxo en marcha outras moitas iniciativas. Fundaron a Editorial Lar e posteriormente a Editorial Nós e dirixiron as Escolas de Insiño Galego, ensino bilingüe e inspirada nos principios da Institución Libre de Enseñanza. Coa proclamación da II República e o ingreso no Partido Galeguista, trasladáronse a Santiago de Compostela, onde seguiu a traballar de costureira. No ámbito político, colaborou na campaña a favor do Estatuto de Autonomía.

Tras o asasinato do seu marido na guerra civil, embarcou na Coruña rumbo a Buenos Aires en novembro de 1936. Na capital arxentina traballou de modista e casou cun curmán, Pedro Miramontes. Mantivo contacto con representantes do exilio galego como Luís Seoane e Maruxa Seoane. Morreu no Sanatorio do Centro Galego de Bos Aires.

Recoñecementos

No ano 2007 o concello de Santiago de Compostela púxolle o seu nome a unha rúa.

Véxase tamén

Bibliografía

• Marco, Aurora (2007). Dicionario de Mulleres Galegas. Vigo: A Nosa Terra. pp. 280–281. ISBN 978-84-8341-146-9. 

Ligazóns externas

• "María Miramontes". Álbum de Mulleres do Consello da Cultura Galega.