José María Sánchez Lage
José María Sánchez Lage, nado en Buenos Aires o 11 de maio de 1931 e finado na mesma cidade o 31 de decembro de 2004, foi un futbolista e adestrador de fútbol arxentino, de orixe galega. Xogaba de dianteiro e destacou principalmente no Oviedo e no Valencia.
| Sánchez Lage | |||
|---|---|---|---|
| Información persoal | |||
| Nome | José María Sánchez Lage | ||
| Nacemento | 11 de maio de 1931 | ||
| Lugar de nacemento | Buenos Aires | ||
| Falecemento | 31 de decembro de 2004 | ||
| Lugar de falecemento | Buenos Aires | ||
| Altura | 175 centímetros | ||
| Posición | Dianteiro | ||
| Carreira xuvenil | |||
| Piraña | |||
| River Plate | |||
| Carreira sénior | |||
| Anos | Equipos | Aprs | (Gls) |
| 1950–1954 | River Plate | ||
| 1951–1953 | → Banfield (cedido) | 85 | (24) |
| 1954–1955 | Huracán | 22 | (4) |
| 1955–1957 | River Plate | ||
| 1958 | Atlanta | 19 | (7) |
| 1958–1963 | Oviedo | 119 | (37) |
| 1963–1966 | Valencia | 74 | (17) |
| 1966–1967 | Deportivo da Coruña | 24 | (4) |
| Levante | 17 | (2) | |
| Adestrador | |||
| 1970–1976 | Valencia (asistente) | ||
| 1981 | River Plate (asistente) | ||
|
Partidos e goles só en liga doméstica. [ editar datos en Wikidata ] | |||
Traxectoria editar
Comezos na Arxentina editar
Naceu en Buenos Aires, sendo fillo de dous inmigrantes galegos, naturais de Vigo.[1][2] Comezou a súa carreira profesional en 1950 en River Plate, saíndo cedido ao ano seguinte a Banfield, onde xogou ata 1953. Alí compartiu equipo entre outros con Eliseo Mouriño e Gustavo Albella, contribuíndo a que o equipo lograse en 1951 un histórico primeiro posto na Primeira División, empatado a puntos co Racing Club. Xogáronse entón no Gasómetro dous partidos de desempate que acabaron 0-0 o primeiro e 1-0 o segundo, con vitoria para Racing cun gol de Mario Boyé. Este equipo de Banfield foi o primeiro dos non chamados grandes en rematar primeiro no fútbol arxentino.[3][4]
En 1954 asinou con Huracán, regresando ao ano seguinte a River Plate. Con este equipo gañou tres campionatos arxentinos consecutivos, aínda que non conseguiu a titularidade nun equipo no que xogaban destacados dianteiros como Omar Sívori, Santiago Vernazza, Walter Gómez e Ángel Labruna.[5] En 1958 pasou ao Atlanta, co que gañou a Copa Suecia, e a continuación fichouno o Real Oviedo por medio do directivo Félix Serrano, que o vira xogar en River.[1]
Etapa no Oviedo editar
O Oviedo pagou por el 400.000 pesetas, e debutou na Primeira División o 4 de xaneiro de 1959, nunha vitoria sobre o Atlético de Madrid no Carlos Tartiere.[6] Fíxose inmediatamente coa titularidade nun equipo no que xogaban os tamén arxentinos Álvarez, Manuel Sánchez, Massey e Evaristo Sande, ademais do propio adestrador, o bonaerense Abel Picabea. Disputou todos os restantes partidos da tempada, anotando seis goles, o primeiro deles contra o Valencia en Mestalla.
Foi unha das principais figuras do Oviedo naqueles anos, nos que o club viviu unha das súas épocas máis gloriosas, culminando co terceiro posto en liga na tempada 1962/63, só por detrás do Real Madrid e o Atlético de Madrid. Xogou 134 partidos nas nas súas cinco tempadas en Asturias, marcando 45 goles.
Chegada ao Valencia editar
Acabada a liga 1962/63 foi inmediatamente traspasado ao Valencia, xunto ao seu compañeiro de equipo Paquito, por un importe total de 4 millóns de pesetas.[7] Debutou co equipo de Scopelli o 12 de xuño no primeiro partido da final da Copa de Feiras contra o Dinamo de Zagreb no Stadion Maksimir iugoslavo, que rematou con vitoria por 1-2. Disputou tamén o partido de volta en Mestalla, onde o Valencia se proclamou campión ao vencer por 2-0. Xogou tres anos máis no club valenciano, disputando outras tres edicións da Copa de Feiras, e formou dianteira entre outros con Héctor Núñez, Poli, Waldo e Guillot. Disputou 106 partidos, marcando 21 goles.
Deportivo da Coruña e Levante editar
Na tempada 1966–67 fichou polo Deportivo da Coruña, ao que chegou xunto aos tamén exvalencianistas García-Verdugo e Suco.[8] Xogou 24 partidos e marcou 4 goles, nunha tempada na que o equipo galego descendeu a Segunda División. Ao ano seguinte pasou ao Levante, na categoría de prata, co que acabou descendendo a Terceira.
Axudante de Alfredo di Stéfano editar
Trala súa retirada foi director técnico do Valencia e xestionou a fichaxe do adestrador Alfredo Di Stéfano, do que tamén foi axudante. Xuntos gañaron a liga na tempada 1970/71.[9][10] Uns anos despois instalouse definitivamente en Buenos Aires, e alí volveu ser asistente de Di Stéfano no River Plate, gañando o campionato arxentino de 1981.
Palmarés editar
River Plate
- Primeira división da Arxentina (3): 1955, 1956, 1957.
Atlanta
- Copa Suecia (1): 1958.
Valencia
- Copa de Feiras (1): 1962/63.
Notas editar
- ↑ 1,0 1,1 "Sánchez Lage, un fichaje sensacional del Oviedo". La Voz de Galicia (en castelán). 26 de febreiro de 1959. p. 5.
- ↑ "Nosotros consiguiendo dos puntos no correremos peligro alguno". El Pueblo Gallego (en castelán) (11632). 22 de marzo de 1959. p. 9. Consultado o 20 de novembro de 2021.
- ↑ "Eliseo Mouriño, un héroe trágico" (en castelán). 8 de xullo de 2016. Consultado o 19 de outubro de 2021.
- ↑ Raffo, Víctor (1996). Banfield. Campeón Moral 1951. ISBN 950-43-6970-7.
- ↑ "Argentina 1955". rsssf.com (en inglés). Consultado o 20 de novembro de 2021.
- ↑ "Hace 15 años nos dejaba Sánchez Lage" (en castelán). 31 de decembro de 2019. Consultado o 20 de novembro de 2021.
- ↑ "Paquito y Sánchez Lage costaron al Valencia 4 millones de pesetas". La Voz de Galicia (en castelán). 27 de abril de 1963. p. 4.
- ↑ "Sánchez Lage y García-Verdugo, han fichado por el R.C. Deportivo". La Noche (en castelán) (13897). 25 de maio de 1966. p. 5. Consultado o 21 de novembro de 2021.
- ↑ "Murió Sánchez Lage, que llevó a Di Stéfano al club Valencia". As (en castelán). 26 de xaneiro de 2005. Consultado o 21 de novembro de 2021.
- ↑ Díaz, Mario (25 de xaneiro de 2005). "José María Sánchez Lage, futbolista". El País (en castelán). Consultado o 21 de novembro de 2021.
Véxase tamén editar
Ligazóns externas editar
- Datos do xogador en BDFutbol (en castelán).
- Datos do xogador en BDFA.com (en castelán).
- Datos do xogador en ciberche.net (en castelán).