Jack Clayton

Jack Clayton, nado en Brighton o 1 de marzo de 1921 e finado en Berkshire o 26 de febreiro de 1995, foi un director de cine británico.

Jack Clayton

Biografía
Nacemento	1 de marzo de 1921 Brighton, Reino Unido
Morte	26 de febreiro de 1995 (73 anos) Slough, Reino Unido
Datos persoais
País de nacionalidade	Reino Unido de Gran Bretaña e Irlanda Reino Unido
Educación	Arnold House School (en)
Actividade
Lugar de traballo	Reino Unido de Gran Bretaña e Irlanda
Ocupación	director de cinema , realizador , actor , produtor de cinema , produtor
Período de actividade	1936 - 1992
Lingua	Lingua inglesa
Familia
Cónxuxe	Haya Harareet (pt) (–1995) Christine Norden (pt) (1947–1953)

Traxectoria

Clayton naceu en Brighton, e comezou a súa carreira cinematográfica coma actor infantil no filme Dark Red Roses (1929). Renunciando á súa aspiración de converterse en patinador de velocidade uniuse aos Denham Film Studios de Alexander Korda en 1935, aos catorce anos, subindo desde mozo dos recados ata axudante do director e montador.

Durante a guerra, traballou en moitos filmes destacados como Wings of the Morning (1937), primeiro filme británico en cor, e con directores estadounidenses de visita no país, coma Thornton Freeland en Over the Moon (1939) e Tim Whelan en Q Planes (1939). Como segundo axudante de director coordinou as tres unidades da produción de Korda The Thief of Baghdad (1940). Tamén gañou experiencia na montaxe axudando a David Lean.

Clayton dirixiu o seu primeiro filme, o documental Naples is a Battlefield (1944), mentres servía na Royal Air Force durante a segunda guerra mundial. A principios da década de 1950 converteuse en produtor asociado para Romulus Films, traballando en filmes como Moulin Rouge (1952) e Beat the Devil (1953), de John Huston.

En 1956 gañou o Oscar á mellor curtametraxe con The Bespoke Overcoat, o seu segundo filme como director, baseado nun relato de Nikolai Gogol.

A súa primeira longametraxe foi Room at the Top (1959), proxecto que herdou do director Peter Glenville, e que foi un éxito comercial e de crítica. A súa distribución nos Estados Unidos converteu a Clayton dun dos directores do momento, fixo unha estrela do seu protagonista, Laurence Harvey e inaugurou unha serie de filmes realistas da New Wave británica.

Seguindo a pauta que dirixiu a súa carreira, cambiou totalmente de estilo de filme no seu seguinte proxecto, a historia de pantasmas Suspense (1961), adaptada por Truman Capote a partir do relato de Henry James Outra volta á torniqueta. Ao que seguiu The Pumpkin Eater (1964), adaptado por Harold Pinter, e que supuxo a primeira colaboración de Clayton co músico Georges Delerue, ademais da primeira aparición da actriz Maggie Smith.

Entre 1968 e 1982 só completou un filme, The Great Gatsby (1974), o filme máis caro da carreira de Clayton, que tamén foi o seu filme de máis éxito comercial.

Tras sufrir un infarto en 1977 volveu ao cinema en 1982. O seu último filme foi The Lonely Passion of Judith Hearne (1987), mais volveu reunirse con Maggie Smith e Georges Delerue en 1992 para o telefilme Memento Mori.

Filmografía

Director

• Naples is a Battlefield (1944, documental)
• The Bespoke Overcoat (1956, curtametraxe)
• Room at the Top (1959)
• Suspense (1961)
• The Pumpkin Eater (1964)
• Our Mother's House (1967)
• O gran Gatsby (1974)
• Something Wicked This Way Comes (1983)
• The Lonely Passion of Judith Hearne (1987)
• Memento Mori (1992)

Véxase tamén

Bibliografía

• World Film Directors, Volume Two, 1945–1985. ed. J. Wakeman. pp 224–227. Nova York: The H.W. Wilson Company, 1988.

Ligazóns externas

• Jack Clayton en Virtual-History
• Jack Clayton na IMDb (en inglés).