Hassiba Boulmerka
Hassiba Boulmerka (en árabe: حسيبة بولمرقة), nada en Constantina o 10 de xullo de 1968, é unha exatleta alxeriana de carreiras de media distancia, campioa olímpica de 1500 m nos Xogos Olímpicos de 1992 e campioa mundial en 1991 e 1995. En 1995 foi galardoada co premio Príncipe de Asturias dos Deportes, para o que o xurado tivo en conta as súas cualidades como atleta e tamén os seus valores humanos.
| Biografía | |
|---|---|
| Nacemento | 10 de xullo de 1968  (55 anos)Constantina, Alxeria |
| Datos persoais | |
| País de nacionalidade | Alxeria |
| Altura | 158 cm |
| Peso | 127 kg |
| Actividade | |
| Ocupación | atleta , mediofondista , corredora |
| Período de actividade | - 1997 |
| Lingua | Árabe |
| Deporte | atletismo |
| Disciplina deportiva | corrida de meia-distância (pt)  |
| Participou en | |
| 1996 | Xogos Olímpicos de 1996 |
| 1992 | Xogos Olímpicos de 1992 |
| 1988 | Xogos Olímpicos de 1988 |
Premios
| |
  | |
Traxectoria editar
Comezou a facer atletismo aos dez anos,[1] e axiña se especializou nas probas de media distancia. Empezou a participar nalgunhas competicións do seu país e máis tarde a nivel continental.
En 1988 e 1989 gañou os 800 e os 1500 metros nos Campionatos de África que se disputaron na cidade alxeriana de Annaba e en Lagos, respectivamente. Un mes máis tarde participou nos Xogos Olímpicos de Seúl, a súa primeira gran competición internacional, onde participou nos 800 e nos 1500 metros, aínda que non pasou as eliminatorias. Nos anos sucesivos os seus resultados foron mellorando pouco a pouco, e en 1991 chegou a súa consagración, ao gañar a medalla de ouro dos 1500 metros dos Campionatos do Mundo de Toquio. Foi a primeira muller africana que gañaba un título mundial de atletismo. Ese ano acabou segunda no ránking mundial da proba cunha marca 4:00,00 lograda en Zúric pouco antes dos mundiais.
Boulmerka espertou a atención dos medios de comunicación internacionais non só polos seus éxitos deportivos, senón polas ameazas de morte[1] que recibiu de grupos fundamentalistas islámicos do seu país polo feito de correr en pantalón curto e negarse a usar o veo nos actos públicos, o que segundo eles ía en contra da súa relixión. Isto obrigouna a trasladar a súa residencia a Europa, en concreto a Francia.
O seu maior éxito deportivo chegou nos Xogos Olímpicos de Barcelona 1992, onde era unha das grandes favoritas e gañou a medalla de ouro nos 1500 metros nunha chegada moi apertada coa rusa Lyudmila Rogachova. O tempo de Boulmerka foi 3:55,30 mellor marca mundial do ano e mellor de toda a súa vida. Foi a primeira medalla de ouro lograda por Alxeria nuns Xogos Olímpicos, e a segunda medalla de ouro lograda por unha atleta musulmá, despois de Nawal El Moutawakel.
Nos dous anos seguintes o seu rendemento baixou bastante, aínda que logrou unha medalla de bronce nos 1500 metros nos Campionatos do Mundo de Stuttgart 1993. Cando parecía que a súa carreira deportiva estaba en declive, deu a sorpresa gañando a medalla de ouro nos Campionatos do Mundo de Gotemburgo 1995, no que era o seu segundo título mundial. Esa foi a súa única vitoria ao longo da temporada, e foi a súa última gran vitoria.
Participou nos Xogos Olímpicos de Atlanta 1996, mais foi eliminada nas semifinais. Tras non participar nos Campionatos do Mundo de Atenas 1997, a finais desa temporada anunciou a súa retirada do atletismo. Máis tarde foi elixida para a comisión de atletas do Comité Olímpico Internacional.[2]
Trala súa retirada, Boulmerka traballou para promover o deporte entre as mulleres do seu país como unha forma de combater o machismo. Ademais, volveu a Alxeria como muller de negocios.[1]
Resultados editar
| Ano | Competición | Lugar | Posición | Marca |
|---|---|---|---|---|
| 1989 | Copa do Mundo | Barcelona | 7.ª en 800 m | 2:00,21 |
| 1991 | Campionato do Mundo | Tokio | 1.ª en 1500 m | 4:02,21 |
| 1992 | Xogos Olímpicos | Barcelona | 1.ª en 1500 m | 3:55,30 |
| 1993 | Campionato do Mundo | Stuttgart | 3.ª en 1500 m | 4:04,29 |
| 1994 | Copa do Mundo | Londres | 1.ª en 1500 m | 4:01,05 |
| 1995 | Campionato do Mundo | Gotemburgo | 1.ª en 1500 m | 4:02,42 |
Marcas persoais editar
- 800 metros: 1:58,72 (Roma, 17 de xullo de 1991)
- 1500 metros: 3:55,30 (Barcelona, 8 de agosto de 1992)
Tamén tivo o récord de África da milla con 4:20.79, obtido en 1991 en Oslo, durante dezasete anos ata que foi superado pola etíope Gelete Burika, con 4:18.23 en 2008.[3]
Notas editar
- ↑ 1,0 1,1 1,2 Hassiba Boulmerka: Defying death threats to win gold, BBC, 11 de febreiro de 2012. Consultado o 11 de febreiro de 2012.
- ↑ "Hassiba Boulmerka: Algerian Role Model". Arquivado dende o orixinal o 12 de setembro de 2008. Consultado o 13 de febreiro de 2012.
- ↑ IAAF, 7 de setembro de 2008: Powell cruises to 9.77 and 9.82 in Rieti – IAAF World Athletics Tour
Véxase tamén editar
| A Galipedia ten un portal sobre: Muller |