Elasticidade (economía)

En Economía, a elasticidade é a relación entre o cambio porcentual nunha variable e o cambio porcentual que se produce noutra variable. Permite, polo tanto, medir a sensibilidade dunha variable a cambios noutra. O feito de que a relación se produza entre cambios porcentuais permite eliminar as unidades de medida do cálculo, simplificando a análise de datos.

De forma xenérica, pode definirse matematicamente a elasticidade Y de X como:

$E_{x,y}=\left|{\frac {\partial x}{\partial y}}\cdot {\frac {y}{x}}\right|$

Elasticidade da demanda

O concepto de elasticidade aplícase frecuentemente a cambios na cantidade demandada, xa sexa en relación á renda do consumidor, ó prezo do ben que se estea a analizar ou ó prezo doutros bens.

Elasticidade-prezo da demanda

A elasticidade-prezo da demanda é a relación existente entre o cambio porcentual producido na cantidade demandada (Q) cando se produce un determinado cambio porcentual no prezo (P):

$E_{Pd}=\left|{\frac {{\frac {Q_{f}-Q_{i}}{Q_{i}}}\cdot \ 100}{{\frac {P_{f}-P_{i}}{P_{i}}}\cdot \ 100}}\right|$, onde os subíndices f representan o prezo e a cantidade finais mentres que os subíndices i se refiren a prezo e cantidade iniciais.

Cando se calcula nun determinado punto (elasticidade-punto) a fórmula adquire a seguinte forma:

$E_{Pd}=\left|{\frac {\partial Q}{\partial P}}\cdot {\frac {P}{Q}}\right|$

Se o valor da elasticidade é superior a 1, dise que a demanda do ben é elástica respecto do prezo (a porcentaxe de variación na cantidade demandada é superior á porcentaxe de variación no prezo); se a elasticidade é inferior a 1, a demanda do ben denomínase inelástica.