Economía do Uruguai

A economía do Uruguai baséase grandemente nas exportacións de produtos agropecuarios, nunha man de obra moi cualificada, e altos niveis de gastos sociais. Despois dun crecemento de 5% a.a. entre 1996 e 1998, a economía sufriu unha recesión entre 1999 e 2002, despois das crises económicas dos veciños e principais parceiros do Mercosur, o Brasil e a Arxentina. Como exemplo, a Arxentina retirou grandes somas de depósitos dos bancos uruguaios en 2001 e 2002, o que resultou nunha especulación coa moeda uruguaia e un crecemento do desemprego. O PIB neses dous anos caeu case 20%, sendo 2002 o peor ano da crise. Unha renegociación da débeda co sector privado en 2003 restaurou a confianza pública. Grazas a isto, e a unha arribada dos prezos das commodities exportadas polo país, a economía volveu crecer, chegando a 10% en 2004, e a 6,1% en 2005, cunha media de 8% ó ano entre o 2004 e o 2008. O 2009 o crecemento foi apenas 1,7% pero o país non sufriu unha recesión grazas a eficientes políticas monetaria e fiscal adoptadas.

Economía do Uruguai
Moeda	peso uruguaio
Organizacións comerciais de que fai parte	OMC, Mercosur, UNASUR
Datos estatísticos
PIB	54,67 mil millóns (2012)
Posición do PIB	94ª no mundo
Crecemento do PIB	3,8% (2012)
PIB per cápita	16 200 (2012)
PIB por sector	agricultura 8,2%, industria 21,6%, servizos 70,2% (2012)
Inflación	8,1% (2012)
Poboación abaixo da limiar de pobreza	dato non dispoñíbel
Total da forza de traballo	1.691.000 (2012)
Forza de traballo por sector	agricultura 13%, industria 14%, servizos 73% (2010)
Desemprego	6,1% (2012)
Industrias	procesamento de alimentos, máquinas eléctricas, equipamentos de transporte, derivados de petróleo, téxtiles, produtos químicos, bebidas
Parcerías comerciais
Exportacións	9 907 millóns (2012)
Produtos de exportación	carne, soia, celulosa, arroz, trigo, madeira, produtos de granxa, la
Principais mercados	Brasil 18,5%, República Popular da China 17,9%, Arxentina 6,8%, Alemaña 4,9% (2012) (2012)
Importacións	12 220 millóns (2012)
Principais produtos importados	petróleo refinado, petróleo bruto, vehículos de pasaxeiros e de carga, pezas de vehículos, telefones celulares
Principais mercados	A República Popular da China 16,1%, a Arxentina 15,8%, o Brasil 14,6%, os Estados Unidos 8,9% e Paraguai 7,2% (2012)
Finanzas públicas
Débeda externa	21,07 mil millóns (2012)
Ingresos	dato non dispoñible
Gastos	dato non dispoñible

Características

Os gandos ovino e bovino son os máis importantes; carne, la, coiro e outros subprodutos constituíron sempre as principais exportacións. De menor relevancia para a economía son os cultivos agrícolas, entre eles, o trigo, o arroz e a soia.

Os recursos minerais son escasos, pero a industria creceu grazas ás importacións de combustibles e materias primas. A principal industria é a alimenticia, seguida pola téxtil e a química. Unha industria que creceu a finais do século XX e principios do XXI é a do software, a que está efectuando exitosas exportacións non tradicionais.

A rede de estradas é boa e o turismo crece rapidamente. O turismo e os servizos financeiros constitúen importantes recursos económicos.

Sistema bancario

O Uruguai foi coñecido como a "Suíza de América", entre outras razóns, pola tradicional presenza de numerosos bancos.

Foi particularmente forte a crise bancaria de 2002 no Uruguai; pero o Estado uruguaio apoiou a devolución de depósitos á ampla maioría dos aforristas, e respectouse a moeda orixinal dos depósitos; por tanto e a longo prazo, a praza financeira uruguaia recuperou a confianza do público. Iso significou tamén o final da até entón habitual costume do Estado uruguaio de asistir aos bancos crebados, e creouse un seguro de depósitos bancarios con cobertura parcial.

É de destacar a existencia do segredo bancario no sistema financeiro, que data de 1982. Aínda que en 2010, o Parlamento estudou o seu levantamento parcial,<, tras aprobar a correspondente lei vén aplicando discretamente e previa actuación xudicial.