Complexo Hospitalario Universitario de Vigo
O Complexo Hospitalario Universitario de Vigo, coñecido polo acrónimo CHUVI é unha institución sanitaria pública creada no ano 2004 que dá atención sanitaria especializada á poboación das comarcas de Vigo, o Baixo Miño, O Condado, A Paradanta e mais Cangas e Moaña no Morrazo. Depende do Servizo Galego de Saúde e está composta por catro hospitais e dous centros de especialidades.
 Hospital Álvaro Cunqueiro, o maior hospital do CHUVI. | |
| Fundación: | 2004 |
|---|---|
| Localización: | Avenida de Clara Campoamor, 341 Beade, Vigo |
| Universidade afiliada: | Universidade de Vigo |
| Camas: | 1241-1905[1] |
| sergas.es/info/chuvi | |
O hospital de maior nivel asistencial, o Hospital Álvaro Cunqueiro, foi inaugurado en 2015, deixando progresivamente sen funcionamento o Hospital Xeral[2].
Ademais da asistencia sanitaria, do CHUVI depende a formación sanitaria da Escola Universitaria de Enfermaría do Meixoeiro, centro adscrito á Universidade de Vigo.[3]
Historia editar
O CHUVI foi creado polo Decreto 95/2004, de 13 de maio dese ano, que dicía na súa exposición de motivos:[4]
A crecente complexidade destas circunstancias, xunto coa segmentación da atención hospitalaria nos seus aspectos asistencial, investigador e docente en varios centros de provisión pública, aconsellan acometer un desenvolvemento organizativo que asegure unha adecuada coordinación dos recursos.
A nova organización deberá garantir o crecemento ordenado dos centros públicos, a optimización dos recursos con independencia da súa localización, a dispoñibilidade dos medios por todas as unidades e un rendemento óptimo dos hospitais do Sergas en Vigo.
Para asegurar o dito proceso é preciso crear a estrutura organizativa común que posibilite unha coordinación efectiva, aínda que tendo en conta a diversidade dos recursos humanos e físicos xa existentes.
Anteriormente a esta data xa se redactaran dous procesos previos de coordinación. O Complexo Hospitalario Xeral-Cíes agrupaba estes dous hospitais mais o psiquiátrico do Rebullón, alén dos correspondentes centros de especialidades. Doutra banda, polo Decreto 37/2001 creárase a área de servizo compartido dos centros Xeral-Cíes e Meixoeiro, que foi encargada ao Instituto Galego de Medicina Técnica (MEDTEC).
Estrutura editar
O CHUVI está composto por:
- Hospital Álvaro Cunqueiro.
- Hospital do Meixoeiro.
- Policlínico Cíes, hospital de cirurxía de ciclo rápido.
- Hospital Nicolás Peña, para pacientes crónicos e atención ambulatoria.
- Dous centros de consultas e atención ambulatoria: A Doblada e Coia.
Ata 2016 tamén integraban o CHUVI o Hospital Xeral (reconvertido en complexo administrativo xudicial) e o Hospital do Rebullón (centro psiquiátrico cuxa actividade foi asumida polo Álvaro Cunqueiro e o Nicolás Peña).
Desde 2015, a hospitalización convencional distribúese entre os hospitais Álvaro Cunqueiro e Meixoeiro. O primeiro conta con 845 camas, das que 318 corresponden á área médica, 249 á área cirúrxica, 76 á área pediátrica, 57 á área obstétrica, 62 á área psiquiátrica e 82 á área de coidados críticos. No hospital do Meixoeiro existen 347 camas, das que 224 corresponden á área médica, 120 á área cirúrxica (fundamentalmente cirurxía sen ingreso) e 3 á área de coidados críticos.
Recursos editar
Equipos de alta tecnoloxía editar
O Complexo Hospitalario Universitario de Vigo conta con diversos equipos e estruturas definidas como de alta tecnoloxía, entre as que se atopan técnicas invasivas, equipos de hemodiálise ou aparellos de diagnóstico pola imaxe.
| Equipo | Abreviatura | Número |
|---|---|---|
| Tomografía computadorizada | TAC | 5 |
| Resonancia magnética | RM | 5 |
| Gammacámara | GAM | 3 |
| Sala de hemodinámica | HEM | 3 |
| Equipos de hemodiálise | DIAL | 57 |
| Litotricia extracorpórea por ondas de choque | LEOC | 0 |
| Bomba de cobalto | BCO | 0 |
| Acelerador de partículas | ALI | 4 |
| Tomografía por emisión de fotóns | SPECT | 3 |
| Tomografía por emisión de positróns | PET | 1 |
| Mamógrafos | MAMOS | 2 |
| Densitómetros | DO | 1 |
| Anxiografía dixital | ASD | 2 |
Xestión da información editar
A información das historias clínicas dos doentes xestiónase de xeito informatizado nunha plataforma integrada e dixitalizada. O programa informático encargado de xestionar a información dos pacientes denomínase IANUS e úsase dende xuño de 2006.[5] A implantación e xestión da información dixitalizada no Complexo Hospitalario Universitario de Vigo foi encargada á doutora Lola Zapata.[6]
O sistema IANUS permite acceder á información dos pacientes desde calquera equipo informático da área, así coma desde todos os centros dependentes do SERGAS. Ademais, este sistema permitiu da implantación da receita electrónica en Galicia.[7]
Poboación atendida editar
O Complexo ofrece atención sanitaria pública á poboación do sur da provincia de Pontevedra. A Área Sanitaria de Vigo abrangue os concellos de Arbo, A Cañiza, Cangas, Covelo, Crecente, Fornelos de Montes, A Guarda, Mondariz, Mondariz-Balneario, Moaña, Mos, As Neves, Pazos de Borbén, Ponteareas, O Porriño, Redondela, O Rosal, Salceda de Caselas, Salvaterra de Miño, Tomiño, Tui e o propio Vigo.
En 2015, o concello de Bueu solicitou adscribirse á Área Sanitaria de Vigo para seren derivados os seus doentes ao Complexo Hospitalario Universitario de Vigo en lugar de ao Complexo Hospitalario Universitario de Santiago (CHUS)[8] como acontecía até ese momento.[9]
O resto da poboación da zona, aga para especialidades como tocoloxía ou pediatría, é atendida no hospital privado e concertado Povisa.
Tamén é centro de referencia, é dicir, que atende tamén a pacientes de fóra da área asignada para:
- Toda Galicia: Cirurxía Cardíaca e Cardioloxía Intervencionista (libre elección de hospital).
- Provincias de Pontevedra e Ourense: Oncoloxía Radioterápica e Cirurxía Torácica.
- Provincia de Pontevedra: Neurocirurxía, Cirurxía Plástica, Cirurxía Pediátrica e Medicina Nuclear.
- Área de Vigo: Psiquiatría e Cirurxía Vascular.
Durante o gromo de febre por virus de Zika de 2016, o CHUVI foi designado centro de referencia en Galicia para as análises do virus.[10]
Notas editar
- ↑ Ministerio de Sanidade (ed.). "Detalle de Centro / Complejo". Arquivado dende o orixinal o 22 de abril de 2016. Consultado o 5 de abril de 2016.
- ↑ «El Xeral mantendrá un tac para los pacientes no ingresados en Beade» La Voz de Galicia, 27/9/2015.
- ↑ uvigo.galuvigo.gal (ed.). "EU de Enfermaría (Meixoeiro) (Centro adscrito público)". Universidade de Vigo. Arquivado dende o orixinal o 19 de abril de 2016. Consultado o 5 de abril de 2016.
- ↑ Diario Oficial de Galicia (ed.). "DECRETO 95/2004, do 13 de maio, polo que se crea o Complexo Hospitalario Universitario de Vigo.". Xunta de Galicia. Consultado o 5 de abril de 2016.
- ↑ Europa Press (ed.). "El Sergas comenzará en junio la implantación de la Historia Clínica Electrónica Única en Vigo.". Consultado o 5 de abril de 2016.
- ↑ Consellería de Saúde (ed.). "Nomeamento de subdirectora asistencial de cirurxías sen ingreso." (PDF). SERGAS. Consultado o 5 de abril de 2016.
- ↑ Servizo Galego de Saúde (ed.). "El Proyecto de Historia Clínica y Receta Electrónica en el ámbito de atención primaria del Servicio Gallego de Salud." (PDF). Arquivado dende o orixinal (PDF) o 14 de abril de 2016. Consultado o 5 de abril de 2016.
- ↑ Pontevedra Viva (ed.). "Bueu non quere depender da área sanitaria do hospital de Santiago.". Consultado o 5 de abril de 2016.
- ↑ Atlántico Diario (ed.). "Bueu quere depender do HAC.". Consultado o 5 de abril de 2016.
- ↑ Xunta de Galicia (ed.). "O SERGAS designa ao CHUVI como centro de referencia para as análises do virus Zika." (PDF). Consultado o 5 de abril de 2016.