Cifras e letras

Cifras e letras
Producido por	TVG con Centroña P.A. e CTV
Presentado por	Paco Lodeiro
Cadea	TVG
Na rede
	http://crtvg.es/programas/?m=1&p=1

Cifras e letras foi un programa-concurso de preguntas e respostas emitido pola Televisión de Galicia. Estaba inspirado no programa francés Des chiffres et des lettres, de mediados da década de 1960. Entre 1991 e 1996 houbo unha versión en español, emitida en La 2 de Televisión Española.

O programa, das produtoras CTV S.A. e Centroña PC, estaba presentado por Paco Lodeiro, coa colaboración técnica da escritora María Canosa (que substituíu a Yolanda Castaño desde o 21 de setembro de 2011)^[1] e do físico Jorge Mira, ela como experta en letras e el como experto en cifras. Emitiuse dende o 13 de febreiro de 2006, de luns a venres ás 15:30, ata principios de 2013. Foi substituído polo concurso Verbas van, co mesmo presentador e colaboradores.

Mecánica editar

En cada programa participaban dous concursantes. Tiñan que pasar trece probas, oito de letras, catro de números e unha a medio concurso chamada O duelo. En cada proba sumaban de 1 a 18 puntos e gañaba quen tivese máis ao final do programa, recibía 500 euros e volvía no programa seguinte. Quen perdía levaba para a casa un dicionario de galego de Edicións Xerais, a obra de referencia do concurso para as probas de letras.

En caso de que ao rematar o programa os dous concursantes estean empatados, reciben cada un 250 euros e volven o día seguinte. Cambian de sitio con respecto ao día anterior e, polo tanto, teñen quendas diferentes.

A orde das probas é a seguinte: cifras, letras, letras, cifras, letras, letras, duelo, cifras, letras, letras, cifras, letras, letras. Agás no duelo, os concursantes van alternando as quendas. En caso de empate en cada proba, ten preferencia a persoa que está no uso da súa quenda.

Cifras editar

Un programa informático xera seis cifras aleatorias e dá un número comprendido entre o 101 e o 999. Gaña o concursante que en 45 segundos atope o número exacto ou que máis se achegue. Se acha o exacto, recibirá nove puntos; se non, serán seis.

Para atopar o número exacto, o concursante terá que combinar as seis cifras de que dispón, utilizando as catro regras básicas: sumar, restar, multiplicar ou dividir. Se repite un número ou o que dá non se corresponde co que realmente logrou, perde a quenda, que pasa ao seu rival. Se este incorre nos mesmos erros, ningún dos dous puntúa.

O programa informático utiliza catorce números: do 1 ao 10, o 25, o 50, o 75 e o 100.

Letras editar

Os concursantes haberán de crear unha palabra coas nove letras que xera un programa informático, sen repetir ningunha das proporcionadas (o que non impide que o programa xere dúas ou máis letras iguais). Dispoñen para iso dun tempo de 30 segundos. Ten dereito a dicir a súa combinación o que ache a palabra máis longa; en caso de empate, ten preferencia o que ten a quenda. Se a palabra está no dicionario de galego de Edicións Xerais, gañará tantos puntos como letras combine. Se para a súa combinación utiliza todas as letras dispoñibles, obterá 18 puntos.

No programa dáse por válido todo o que aparece no dicionario. Así, son válidas as formas prenominais do verbo, os sufixos, os prefixos e, como o taboleiro non ten acentos, tamén palabras sen el aínda que o teñan.

Tanto nas cifras como nas letras, existe a posibilidade de "rebote": se un concursante dá mal un número ou unha palabra, ou esta última non está recollida no dicionario de Xerais, a quenda pasa ao seu rival, sempre que este teña combinado algo. É dicir, se o segundo concursante dixo que non tiña nada nos números ou nas letras, non hai puntos para ningún dos dous.

O duelo editar

O duelo é unha proba de letras que se fai no medio do concurso. En cada programa hai un tema monográfico e esta proba versa sobre el. Os concursantes dispoñen de 30 segundos para atopar dúas palabras determinadas entre as nove letras que pon á súa disposición o programa informático. O que primeiro crea que atopou as palabras haberá de pulsar un avisador. Sempre que estas sexan as procuradas, gañará 10 puntos. Se falla ou se pica o pulsador antes de tempo, os 10 puntos pasan ao seu contrincante.

Historia editar

O programa comezouse a emitir en 2006. O 14 de maio de 2010 chegou ás mil emisións. En total emitíronse 1448 programas na canle autonómica. O programa deixou de emitirse a principios do 2013.

O récord da versión galega teno Fernando González Vázquez, Fer, un profesor de autoescola de Cangas que permaneceu 95 programas^[2] e sumou 46.750 euros ata o 27 de febreiro de 2009. En segundo lugar sitúase Martín López Nores, enxeñeiro de Telecomunicacións de Marín, que pouco despois chegou a 59 programas^[3]. Fer foi o que estivo máis preto do récord absoluto de Cifras e Letras en España, Francisco Segura, de Almería, quen aguantou 117 programas na versión emitida en Canal Sur 2.

O récord de puntuación nunha soa emisión teno Eva, con 96 puntos. O récord absoluto conseguiuno o devandito Martín cando, no especial polo programa número mil, emitido en dúas partes, sumou 126 puntos.