Cherrybomb (filme)
Cherrybomb é un filme británico de 2009 dirixido por Lisa Barros D'Sa e Glenn Leyburn, protagonizado por Rupert Grint, Kimberley Nixon, Robert Sheehan e James Nesbitt. A rodaxe empezou en Belfast o 7 de xullo de 2008 e durou catro semanas.[1] O filme inclúe espidos, consumo de alcol e drogas, furtos en tendas e roubos de coches.[2] Foi publicada en DVD o 23 de agosto de 2010 no Reino Unido. Estreouse nos EUA en setembro de 2009 en Los Angeles Irish Film Festival.[3] O tema central do filme é "Cherrybomb", de The Runaways.
| Cherrybomb | |
|---|---|
| Ficha técnica | |
| Na rede | |
| http://www.cherrybombmovie.net/ | |
        |
Cherrybomb estreouse en 2009 no Festival Internacional de Cinema de Berlín, mais inicialmente non foi posíbel atopar distribuidor. As seareiras e seareiros de Grint impulsaron unha campaña co fin de lograr un acordo de distribución no Reino Unido.[4]
Argumento editar
Malachy McKinny, un estudante de secundaria aplicado, traballa no Titanic Leisureplex, un centro de deportes propiedade de Dave. O seu mellor amigo é Luke, un traficante de drogas que vive co seu pai, drogadicto. Os dous mozos fican abraiados con Michelle, unha moza fermosa e con carisma que vén de mudarse de Londres para vivir co seu pai, Dave.
Luke e Malachy tentan gañar o afecto de Michelle, polo que compiten entre eles nun desenfreo de sexo, drogas, vandalismo, roubos e pelexas. Porén, os tres adolescentes acaban por decatarse de que a situación se lles foi das mans. A festa que montan no Titanic Leisureplex remata nunha desfeita cando Dave chega e atópao todo estragado. Bótalle a culpa a Malachy, e houbo matalo a golpes, mais Luke sálvao golpeando a Dave na cabeza cun pau.
Desorientado, Dave vira amodo cara Luke, quen lle volve bater na cabeza. Malachy, ensanguentado e cheo de negróns, levántase e dille a Luke que non quere deixar alí a Michelle, quen está a chorar ante o seu pai, morto. Luke fica con Malachy "apoiándoo", até que chegan a ambulancia e a policía e son detidos para tomárenlles declaración.
O final do filme coincide coa secuencia de apertura. Malia vérense só anacos do interrogatorio final, escóitanse as últimas palabras de Malachy e Luke.
Elenco editar
- Rupert Grint como Malachy McKinney
- Robert Sheehan como Luke
- Kimberley Nixon como Michelle
- James Nesbitt como Dave, o pai de Michelle
- Niamh Quinn como Donna
- Paul Kennedy como Chris
- Conor MacNeill como Fanta
- Greer Ellison como Bun
- Kat Kirk como Sharon
- Kathy Kiera Clarke como Emma
- Lalor Roddy como Smiley
- Paul Garrett como Bob
- Paul Caddell como profesor de natación
- Richard Orr como Tío Joe
- Bronach Lawlor como Jessica
- Maggie Hayes como Tía Maggie
Notas editar
- ↑ Carville, Daragh (21 de maio de 2008). "‘CherryBomb’ Greenlit at Generator Entertainment". iftn.ie (en inglés). Consultado o 15 de xuño de 2023.
- ↑ Redacción (26 de febreiro de 2008). "Home Grown Films Funding Boost". 4rfv.co.uk (en inglés). Consultado o 15 de xuño de 2023.
- ↑ Kay, Jeremy (17 de agosto de 2009). "Cherrybomb among five US premieres at LA Irish Film Festival". screendaily.com (en inglés). Consultado o 15 de xuño de 2023.
- ↑ "Fans secure film deal for Grint". bbc.co.uk (en inglés). 5 de outubro de 2009. Consultado o 15 de xuño de 2023.