Carboneras

Carboneras é un concello español, situado ao sueste da provincia de Almería. No ano 2005 contaba 7.267 habitantes. Ten unha extensión de 95 km², unha densidade de 76,5 hab/km². É un concello costeiro mediterráneo, a 68 km da cidade de Almería. Os seus principais intereses son unha central térmica, a desalgadora máis grande de Europa, as súas festas de mouros e cristiáns e por un polémico hotel a medio construír na zona de El Algarrobico.

Carboneras

Localización
37°00′02″N 1°53′31″O
Estado	España
Comunidade autónoma	Andalucía
Provincia	Provincia de Almería
Capital	Carboneras
Poboación
Poboación	8.375 (2023) (87,73 hab./km²)
Xeografía
Parte de	Distrito notarial de Vera Mancomunidade de concellos do Levante Almeriense Levante Almeriense
Superficie	95,46 km²
Bañado por	Mar Mediterráneo
Altitude	10 m
Comparte fronteira con	Níjar Turre Sorbas Lucainena de las Torres Mojácar
Organización política
• Alcalde	José Luis Amérigo Fernández (en)
Identificador descritivo
Código postal	04140
Fuso horario	UTC+01:00
Código INE	04032
Páxina web	ayuntamientocarboneras.com

Playa de los Muertos, no sur do concello.

Demografía

O concello, eminentemente turístico, coñeceu un importante crecemento de poboación na última década. Dende os 6.215 habitantes de 1996, pasou aos 7.508 en 2006 (un 21% de aumento nunha soa década). Iso é debido fundamentalmente á inmigración, ben de traballadores para as importantes industrias do concello, ben de turistas fundamentalmente británicos e alemáns, que escollen a costa almeriense como lugar de residencia durante boa parte do ano.

Xeografía

O concello de Carboneras ten un relevo bastante montañoso cara ao interior, cunha altura media de 10 m sobre o nivel do mar malia o seu perímetro costeiro. A zona interior atópase nas inmediacións da Serra Cabrera, unha formación montañosa ao norte do concello. Na costa hai grandes areais, como os urbanos de Carboneras, ou os de El Algarrobico, ao norte e Playa de los Muertos ao sur, cunhas formacións rochosas particulares. Os outros accidentes xeográficos máis importantes son a Mesa de Roldán, unha montaña costeira, o cabo de Media Naranja, e a illa de San Andrés, unha pequena illa fronte ao núcleo urbano.

Unha pequena zona sur do concello, practicamente deshabitada, atópase comprendida dentro dos lindes do Parque Natural Serra de Gata-Níjar.

A localidade principal é Carboneras. Tamén pertencen ao concello os lugares de Argamasón, El Llano de Don Antonio, La Cueva del Pájaro ou El Algarrobico.

O concello limita ao leste co mar Mediterráneo, ao norte cos concellos de Mojácar e Turre, ao oeste co de Sorbas e ao sur co de Níjar.

Historia

A primeira referencia histórica de Carboneras é a entrega que en 1559 lle fixo Filipe II de España ao marqués de Carpio coa obriga de construír o castelo de San Andrés. Este é o edificio histórico máis importante da localidade, atópase no centro do núcleo urbano, e serviu o exército castelán na guerra contra os mouriscos durante a revolta das Alpujarras.

Economía

Costa do concello de norte a sur. En primeiro termo, a praia de El Algarrobico.

O nome de Carboneras procede dunha antiga explotación de carbón na localidade. Dese tipo de extracción mineira cesou, pero continúa existindo unha central térmica da empresa Endesa. Tamén existe unha planta desalgadora da auga mariña, a maior de Europa, e unha importante factoría de cemento.

A industria turística é tamén moi importante. De feito, no termo do concello sitúase o hotel Azata del Sol, un grande complexo de 20 andares e 411 habitacións situado a poucos metros da costa. O hotel quedou a medio construír logo de diversas protestas ecoloxistas e dunha decisión xudicial, e a Xunta de Andalucía anunciou a súa demolición, aínda non producida.