BD Banda

BD Banda é un colectivo galego que ten por obxecto a promoción e difusión da banda deseñada en Galiza. O colectivo formouse en torno ao ano 2001 ao redor da revista homónima.

Historia

A revista nace no ano 2001 a partir da iniciativa do debuxante Kiko da Silva e de Cano Paz, encargado da Libraría Paz de Pontevedra. O seu obxectivo era, segundo se pode ler na súa páxina web: crear un medio no que os autores galegos puidesen publicar cunhas boas condicións gráficas e de maquetación uns traballos que daquela carecían de canles para chegar ó público. O 17 de maio aparece en Pontevedra o primeiro número cunha tiraxe de 1000 exemplares de 90 páxinas.

O éxito acadado polo primeiro número leva ao concello de Pontevedra a apoiar economicamente o proxecto e apoiando a realización das primeiras xornadas de BD da cidade coordinadas polos propios Kiko e Cano. Pouco despois os membros do estudio de deseño gráfico ourensán O Clube da Esquina (Héitor Real e Miguel Anjo Carvalho, antigos Comisarios) intégranse no proxecto. Xa cara ao terceiro número convócase unha reunión en Ourense coa finalidade de crear un Consello de Redacción na que alén dos mencionados participan en maior ou menor grao Xermán Hermida, Francisco Paradelo, Miguel Porto, David Rubín e Miguel Anxo Robledo.

Na actualidade o núcleo do colectivo compóñeno Kiko, Cano, Héitor, Carvalho, Paco Paredelo e Germám, e procuran converterse no medio de expresión e plataforma de lanzamento dos autores de banda deseñada do país, permitindo que os seus traballos cheguen a un público cada vez máis amplo.. O colectivo tamén se lanzou nos últimos anos á edición coa Colección BD Banda, cuxos primeiros tres números se publicaron en coedición coa editorial Kalandraka, mais logo da creación do selo Faktoría K de Libros por parte da editorial en 2005 o colectivo pasa a ser o que xestione esta colección dentro da editora. O colectivo sostén na súa páxina web que os seus obxectivos pasan por: continuar publicando obras de calidade, que axuden a difundir a novena arte e que permitan desenvolver o xénero en Galiza. É tamén a nosa intención conseguir que as obras estranxeiras sexan coñecidas polo público no noso propio idioma.De igual xeito, sinalar que pretendemos que as edicións en castelán dos álbums editados baixo a nosa responsabilidade se distribúan unicamente fóra do noso país. Tentando ao mesmo tempo que: a revista seguirá a ser un proxecto propio do noso colectivo, con total independencia económica e creativa, ao igual que aqueloutros proxectos de difusión e dignificación da banda deseñada en xeral e galega en particular que abordaremos nun futuro achegado.

Premios

• Premio ao Mellor Fanzine no Saló del Còmic de Barcelona 2005
• Premio Ourense á mellor iniciativa no campo da banda deseñada 2005

Publicacións

• Seis números da revista BD Banda
• Catro números da Colección Bd Banda de álbums a toda cor e con tapa dura:

• Fiz nos Biosbardos de Kiko Dasilva
• Thom de Andrés Meixide (tamén editado en español)
• Tito Longueirón, deportista de Pinto & Chinto
• Astro, valente explorador de Javier Olivares
• Detectives Audaces de Beroy (tamén editado en español)
• Vilaverzas de Miguel Robledo (tamén editado en español)

• Albume cos traballos premiados no I Certame BD Banda-Concello de Pontevedra
• Edición dun gravado numerado e asinado para agasallar do número 1
• Edición dunha postal de felicitación de Nadal ilustrada por Miguelanxo Prado
• Páxina web bdbanda.com
• Camisetas BD Banda (con deseño de Kiko da Silva)

Xornadas

• Organización das I Xornadas BD Banda-Concello de Pontevedra (As xornadas incluíron obradoiros de banda deseñada, presentacións, exposicións e mesas redondas. Desenvolvéronse no Pazo de Mugártegui en decembro de 2002 con presenza da práctica totalidade de autores galegos do momento.)
• Colaboración na organización das Xornadas Compostela BD (2004)
• Colaboración na organización das Xornadas de BD Concello de Pontevedra (2005)
• Colaboración na organización da Festa da Lingua de Pontevedra 2005

Actos públicos

• Presenza anual en Viñetas desde o Atlántico desde o ano 2001 presentando as novidades do proxecto. Desde 2004, o colectivo conta con posto propio.
• Presenza nas Xornadas de Banda Deseñada de Ourense 2001
• Presenza nas Xornadas de Cómic de Cangas 2001 presentando a revista
• Presentación pública de todos os números da revista en Pontevedra, con sesións de sinaturas.
• Sesións de sinaturas de autores na presentación do número tres e na clausura da exposición de premios en Pontevedra
• Presentación e sesión de sinaturas de autores da revista na librería Torga de Ourense
• Presentación da revista na librería de Kalandraka en Vigo
• Presentación nas Xornadas de Literatura Infantil e Xuvenil en Pontevedra

Certames

• Convocatoria do I Certame BD Banda-Concello de Pontevedra
• Convocatoria do I Certame de BD por Internet BD Banda-culturagalega.org

Exposicións

• Organización da mostra “A Banda Avanza” nas feiras do libro de Pontevedra, Cangas e Coruña 2006, en colaboración coa Consellaría de Cultura e o Consello da Cultura Galega. Esta mostra estaría posteriormente presente en:

• Saló del Còmic de Barcelona de 2007.
• Festival International de la Bande Dessinée d'Angoulême en 2008

• Mostra monográfica sobre a revista en Viñetas desde o Atlántico (2005). Tamén vista no:

• Saló del Còmic de Barcelona
• Saló del Còmic de Cornellà
• Semana do Humor de Silleda
• Verbum - Casa das palabras de Vigo
• I edición do Salón Cultur.gal

• Exposición de traballos premiados no I Certame BD Banda-Concello de Pontevedra (2002)

• No Teatro Principal e na Casa da Luz de Pontevedra
• Nas Xornadas de Ourense 2002

• Exposición de autores BD Banda

• nas I Xornadas BD Banda-Concello de Pontevedra
• nas Xornadas de Cómic de Culleredo

• A exposición A Xeración BD Banda da Semana Itinerante da BD (2003) contén en grande medida traballos publicados na revista
• A exposición A nova BD Banda de 2007 foi exposta en:

• Casa da Cultura do Porriño
• Cultur.gal
• Anda na Banda do programa Lugo Cultural

Véxase tamén

Outros artigos

• Banda deseñada
• Golfiño

Ligazóns externas

• Páxina web oficial do colectivo